Den conferencia di prensa ofreci diabierna mainta Frans Ponson, como miembro di directiva di Comerciantenan Uni Aruba, y mescos cu e siman prome, a toca diferente punto di actualidad cu ta preocupa nan miembro. Un di eseynan tabata e impresion cu a bay cu ne for di e reunion sosteni cu Minister di Energia, Glenbert Croes y ehecutivonan di WEB Aruba N.V. CUA ta spera un reduccion grandi den e tarifa di awa basa riba e echo cu e compania productor di awa y coriente, a bisa cu pronto lo reduci nan consumo di heavy fuel oil cu mil bari pa dia.
E tarifanan nobo di awa ta keda un punto hopi importante pa e organisacion tumando nota cu ta trata di un aumento di 32% adicional na e inflacion considerabel cu ta conociendo. “Ta hopi preocupante pa nos,” asina Ponson a bisa. “Mester wak con ta bay maneh’e. Ta facil pa bisa cu ta bin cu un BTW ora bo tin e poder ey,” pero segun CUA ningun comerciante por haci algo asina’ki; esta di aumenta su prijs cu un indice halto.
E organisacion di e gremio comercial ta satisfecho di tende cu pronto lo tin oportunidad atrobe di sinta na mesa cu e minister di energia y e compania di utilidad pa haya un actualisacion. “Nos ta contento di tende esey. Cu pa prome biaha kier papia cu comercio prome cu tuma decision. Algo cu nunca a tende prome y nunca a pasa,” segun Ponson.
Por lo pronto ta wak cu bay for di 4 mil pa 3 mil bari di heavy fuel oil pa dia ta un reduccion di 25% y esey lo mester tin un efecto bentahoso pa e consumidor di awa, sea residencial of comercial. “Esey nos tin cu wak si ta berdad. Hopi lihe nos lo sinta na mesa pa cuestiona esey.”