Frakshon di MAN ta sumamente orguyoso ku buelonan di Caribbean Airlines for di Trinidad & Tobago

Frakshon di MAN ta sumamente orguyoso ku buelonan di Caribbean Airlines for di Trinidad & Tobago i ta elogiá Steven Martina pa e esfuersonan hasí.

Despues di a reuní na diferente okashon ku gerente di Curinde i tambe komersiantenan den Curinde pa skucha nan preokupashon porfin nan deseo a keda realisá. Un di e preokupashonnan di mas grandi ku a resaltá tabata e buelonan for di Trinidad & Tobago ku kasi no tabatin mas, komo konsekuensia ku den zona liber nan tabata hiba hopi pèrdida, ya ku Trinidad & Tobago tabata e di dos Pais ku mas tabata hasi kompra den Zona liber.

Ex- Minister Steven Martina a kuminsá mesora ku e trámitenan i a buska kontakto ku gerente di Caribbean Airlines. Na luna di yüli 2018 durante di un biahe di trabou ex- minister Steven Martina huntu ku su ministerio, CTB, CURINDE i diferente otro kompania a biaha pa Trinidad & Tobago ku e meta pa realisá konekshon entre Kòrsou i Trinidad & Tobago. Promé ku e biahe aki a bolbe tuma kontakto ku gerente di Caribbean Airways pa sigurá un kombersashon ku nan.

Na yegada na Trinidad & Tobago esei tabata e promé reunion ku a tuma lugá. Tabata un reunion hopi eksitoso i fruktífero, i ambos Pais a mira e nesesidat di buelonan entre Kòrsou i Trinidad & Tobago, i eynan a hasi mesora e kompromiso ku lo bai traha pa realisá esaki.Meo, CTB, i Curinde a sigui traha inkansabel ku e trabounan i awe Kòrsou por ta orguyoso ku esaki a keda realisá. Esaki lo fortifiká tantu zona liber pero tambe nos turismo.

Ku e logro grandi aki frakshon di MAN un biaha mas ta elogiá sr Steven Martina ku su trabounan inkansabel i ku awe nos ta mira e frutanan na bienestar di nos ekonomia.