Frakshon di MAN ta pidi reunion urgente riba maneho pa ku indokumentadonan


Frakshon di MAN ta pidi reunion urgente relashoná ku maneho di Minister di Hustisia pa ku indokumentadonan ku ta drenta nos pais for di Venezuela.

Frakshon di MAN a tuma nota ku Minister di Hustisia a tuma un desishon ku personanan indokumentá for di Venezuela ku ta drenta nos pais, no ta keda detené sino ta registrá e personanan i nan por drenta nos komunidat.

Nos a tuma nota tambe di hopi konsternashon ku e desishon aki di Minister di Hustisia a kousa den komunidat i a trese hopi interogatorio.  

Frakshon di MAN ke enfatisá ku e ta komprondé e situashon difisil ku Venezolanonan ta pasando aden den nan pais Venezuela pero ke suprayá ku nos mes pais Kòrsou tambe tin su retonan sosial, ekonómiko i finansiero ku ta meresé tur atenshon di Gobièrnu.

Den e kuadro aki pa trese tur informashon korekto i al kaso na komunidat di e desishon tumá frakshon di MAN a manda un karta pa presidente di parlamento den kual ta urgi’e pa  konvoká un reunion di komishon sentral ku karakter di urgensia pa deliberá ku Minister di Asuntunan General, Minister di Desaroyo Sosial, Labor i Bienestar i Minister di Hustisia riba e tópiko. Den e karta tambe a hasi petishon pa mando di Kuerpo Polisial i Servisio di Atmishon ta presente.

Comments

comments