Frakshon di MAN ta felisitá hobennan elegí pa Parlamento Hubenil

197

Djabièrnè último pa medio di un elekshon a skohe e 21 hóbennan ku mester representá nos hóbennan den Parlamento Hubenil
Esaki ta enserá ku awor nos hóbennan a haña e plataforma pa kompartí i debatí riba temanan di nan interes i ku ta biba bou di nos hóbennan i komunidat mirá for di nan punto di bista. I asina tambe haña oportunidat pa influensiá desishonan i krea maneho pa loke ta trata nos hóbennan.
Frakshon di MAN ta spera ku esaki ta lanta mas interes serka otro hóbennan tambe pa ta mas aktivo i partisipativo ora ta trata nan futuro i di nan pais. Si for di hóben bo ta bon informá i ta partisipá aktivamente den aspektonan di bo pais bo por opiná mihó tambe.
Nos ta felisita Bos di Hubentut ku e tremendo plataforma aki p’asina nos por krea futuro lidernan den nos pais.
Frakshon di MAN ta semper porta habrí pa kualke sosten i konseho na nos hóbennan en general i awor tambe esnan di Parlamento Hubenil i ta spera pronto di por sera konosí ku tur e 21 representantenan aki.
Masha pabien i éksito ku e reto nobo aki.