Despues di tur e añanan ku nos grandinan a aportá na nos komunidat i a kuida nos, awor ta na nos pa kuida nan ku e mesun dedikashon, amor i rèspèt.
Na momentu ku nos mes komo famia no por kuida nos ser kerí tin e posibilidat pa laga esaki den man di un kas di kuido pa grandinan. Un kas di kuido ta e lugá kaminda nos grandinan mester sinti nan mes bon i seif i kaminda nan ta haña e kuido i atenshon nesesario. Kaminda nan por keda den kontakto i interkambiá ku otro grandinan. Fundashon Birgen di Rosario, kual ta e fundashon mama pa kasnan di kuido Mi Amparo, Nos Lanterno, Richardushuis i Huize Welgelegen, pa 75 aña kaba a bin ta brinda e servisio i kuido na nos mamai, welo, tanta i tio, padrino i demas grandinan di Kòrsou.
Esaki ta demostrá e balor grandi ku kasnan di kuido tin pa nos grandinan i komunidat. Frakshon di MAN ta felisitá Fundashon Birgen di Rosario ku e bon trabou ku e bin ta desplegá durante e 75 añanan aki i ta boga p’e fundashon sigui hopi aña mas ku e mesun dedikashon brindando kuido i atenshon na nos grandinan.