Resientemente tabatin un reunion públiko ku a keda pidí pa frakshon di MAN den kual a deliberá ku entre otro minister di hustisia enkuantu e situashon alarmante di ladronisia di outo aki na Kòrsou.
Durante di e reunion Parlamentarionan pa frakshon di MAN a trese diferente punto dilanti i tambe a urgi minister pa mas pronto ku ta posibel trese solushon duradero pa ku ladronisia di outo. Pa frakshon di MAN ta importante pa e siudadano tin e sentido di seguridat i nò ta kore riesgo di bira víktima di ladronisia di outo.
Resientemente, komunidat por a tuma nota ku a deskubrí un kantidat grandi di outo hòrtá i tambe personanan a keda detené pa responsabilisá pa e akto aki. Frakshon di MAN ta kontentu ku e akshonnan ta dunando su frutanan i ta pidi minister di Hustisia pa sigui atendé ku ladronisia di outo ku man fuerte i trese trankilidat bèk den komunidat.
