Resientemente frakshon di MAN riba inisiativa di Parlamentario Yael Plet a entregá un proposishon di kambio di lei den Landsverordening minimumlonen. Manera ta konosí aktualmente den e lei ku ta regla tarifa pa suèldu mínimo tin diferente tarifa di kual esaki ta mara na edat abase di porsentahe.
Aktualmente un persona ku tin 20 aña ta kobra 90% di e tarifa di suèldo mínimo ku lei ta preskribí, 19 aña ta 85%, 18 aña 75% i 17/16 aña 65%. Ku e proposishon di kambio di lei aki ta trese kun’e ku un persona for di su 18 aña ta kobra 100% di e tarifa di suèldu mínimo ku lei ta preskribí. Motibu di esaki ta ku un persona for di 18 aña bai ariba ku pa lei ta un mayor di edat i ku ta haña e derechi di por atendé tur su kosnan legalmente su mes sin mester di outorisashon di entre otro su mayornan.
Segun International Labour Organization (ILO) tur hende ku ta laborá mester risibí pago igual pa trabou igual (equal work, equal pay). Tambe un persona ku tin 18 aña ku ta laborando tin e mesun derechinan ku esun di 21 aña i no ta konose diferensia entre gastunan. Ta spera ku despues ku e inisiativa di kambio di lei kana su kamindanan konforme prosedura i ku pronto e lo ta den Parlamento pa ser trata i aprobá.
