Pa basta dia kaba nos di frakshon di MAN ta tumando nota di diferente situashon ku ta afektá seguridat di nos pais. Último tempu tin diferente kasonan di tiroteo i tambe kasonan di asesinato i tambe kasonan kaminda tabatin huida masalmente for di sèlnan di polis.
Loke ta laga nos ku un doló inmenso na nos kurason ta ku personanan inosente sea ta keda herida òf ta pèrdè nan bida den kaso di tiroteo. Hopi kaso di tiroteo ta indiká ku tin hopi arma di kandela ilegal ta sirkulá ketu bai den nos pais. Mirando e situashonnan alarmante ariba menshoná frakshon di MAN a manda un karta den kual ta urgi presidente di parlamento pa konvoká pa un reunion públiko ku karakter di urgensia konforme artíkulo 64 di nos Reglamentu di Òrdu ku Minister di Hustisia pa nos debatí i tende di Gobièrnu ki ta e maneho ku Gobièrnu lo bai ehekutá a korto plaso pa ku e situashon aki. Pa frakshon di MAN e sentido di seguridat i trankilidat bou di nos pueblo ta di sumo importansia.
