Na aña 2013 gobièrnu a tuma e desishon pa kambia e lei di penshun di behes (AOV) i penshun di Buida buido i wèrfano (AWW). Un di e kambionan mas drástiko tabata ku a kita indeksashon di e penshun ku tabata mara na oumento di kosto di bida I a stipulá ku si tin kresementu ekonómiko e ora ei so ta indeksá e penshun.

Ta bon konosí pa nos tur ku den e último añanan lamentablemente nos pais no a konosé kresementu ekonómiko por  konsigiente nos hende grandinan su penshun di behes pa algun aña a keda meskos ; sin niun subida. Den su boletin di ougùstùs 2017 Centraal Bureau voor Statistiek (CBS)ta ta bisa ku maramentu di indeksashon di penshun di behes na kresementu ekonómiko tabata un eror
pasobra nos NO ta dispone di un sistema pa kalkulá kresementu ekonómiko pa luna. Lei ta stipulá ku pa determiná indeksashon òf no di penshun di behes mester hasi kalkulashon  saliendo for di e periodo entre ougùstùs di e aña anterior i ougùstùs di e aña koriente. Posibel subida ta drenta na vigor e ora ei entrante yanüari di aña ku ta sigui. CBS ta bisa klaramente na paginá 2 di e boletin, i nos ta sita “ Inflashon ta un refleho di pèrdida di balor di sèn pues di
poder di kompra pasobra e preis ku e konsumidó tin ku paga pa servisio i produktonan a subi.

E Porsentahe di inflashon pues ta un indikashon di subida promedio di e gastunan mara na kosto di bida. Esei CBS ta konsehá pa usa esaki komo instrumento pa indeksá salarionan, penshunnan, kualke pago sosial, suèldu minimá i otro entradanan “. CBS ta indiká tambe den su boletin na paginá 3 ku e sifra pa indeksá e preisnan pa konsumidó  (Consumentenprijsindex, CPI) entre ougùstùs 2016 pa ougùstùs 2017 a subi ku un averahe di 0.8 porshento. Tumando tur e puntonan ariba menshoná prinsipalmente loke CBS a konsehá I teniendo kuenta ku derechi di nos penshonadonan frakshon di MAN a entrega un konsepto pa kambio di lei kaminda ta indeksá penshun di behes i penshun di buida buido i
wèrfano tumando indeksashon basa riba kosto di bida komo punto di salida manera e tabata semper promé ku a kambia e lei na 2013.

Comments

comments