Frakshon di MAN, pa medio di e komunikado, ta bolbe enfatisá e importansia krusial ku
nos sektor petrolero tin pa nos pais i nos ekonomia.
Kontinuidat i modernisashon di nos refineria ta nifiká entre otro: konsolidashon di aktividatnan ekonómiko eksistente, potensial pa aktividatnan ekonómiko nobo, kresementu di nos ekonomia, kreashon di kuponan di trabou duradero i un mihó kontesta pa e retonan riba tereno sosial i ambiental. Konseho di Minister, dia 30 di desèmber 2017, a konkluí ku na e momento aki GZE lo no ta den e kapasidat pa ni finansieramente ni téknikamente kumpli ku loke ta nesesario pa ku nos refineria. A base di esei a disidí pa nulifiká e kontraktnan ku GZE i asina habri kaminda pa por kuminsá buska un partner apropiá. Frakshon di MAN por komprondé e desishon aki. Frakshon di MAN di otro banda tin komprenshon tambe pa ku e sentimentunan ku a surgi den komunidat. Pueblo di Kòrsou kompletu tabata den espektativanan pa loke ta trata modernisashon i kontinuidat di nos refineria i, a mira GZE komo un posibel partner pa ehekutá e proyekto aki. Frakshon di MAN, meskos ku gran parti di nos komunidat, ta di opinion ku mester eksplorá tur avenida pa garantisá operashon kontinuo di refineria i teniendo kuenta ku su impakto riba nos medio ambiente.
P’esei ta importante pa Gobièrnu aktua diligente i rápido den buska un solushon i asina garantisá kontinuidat di nos refineria. Frakshon di MAN ta enfatisá tambe ku e manera riba kua MDPT a bin ta funshoná no a krea konfiansa serka frakshon di MAN. Esaki, mirando ku MDPT tin 4 aña kaba ta negoshando na un forma no reglamentá ni transparente, sin proseduranan interno, gastunan haltu ku a keda hasí, informashonnan ku a lèk, falta di kontrol riba hinter e proseso aki, i sin resultado . Frakshon di MAN ta di opinion ku mester tuma e pasonan pa perkurá pa bin ku un organisashon ku ta funshoná transparente, kaminda tur miembro ta enbolbí tur momentu i ku ta duna informashon na Konseho di Minister i Parlamento di Kòrsou riba un base regular.
Mas ainda mirando ku falta apénas 2 aña promé ku e kontrato ku PDVSA vense na desèmber 2019. Mester yega na un partner stratégiko nobo rápidamente. Frakshon di MAN ta enfatisá ku nos mester di un tim nukleo pa sigui ku e negosashonnan di awor en adelante ku ta funshoná profeshonal a base di reglanan di bon gobernashon i ku ta kai bou di responsabilidat di Konseho di Minister den su totalidat mirando ku aki ta trata di interes general. Frakshon di MAN ta konfia ku riba término korto por bin klaridat riba futuro di refineria. E susesonan di último lunanan ku deklarashonnan no profeshonal den públiko di parti di MDPT pa ku GZE ta buta ku Frakshon di MAN ta kuestioná kapasidat di e aktual MDPT pa di forma ophetivo por atendé ku un eventual konsorsio den kua GZE ta forma parti. Frakshon di MAN ta konfia ku Gobièrnu sa pa tuma e pasonan nesesario pa garantisá un solushon adekuá, guiá dor di un tim kapas, eksperensiá i profeshonal i asina garantisá transparensia i kontinuidat di nos refineria i un desaroyo duradero pa nos pais.
