Dialuna mainta fraccion di MEP den Parlamento a tene un conferencia di prensa, unda cu tanto parlamentario Marco Berlis como tambe Hendrik Tevreden a trece nan pensamento dilanti pa loke ta e decision di Hof tocante matrimonio entre dos persona di e mesun sexo.
Parlamentario Tevreden a elabora riba e situacion unda mayornan preocupa a sali vocifera cu nan no ta di acuerdo cu e les di identidad di genero cu nan yiu a ricibi. Tevreden ta para hunto cu e mayornan riba e situacion aki. Ademas parlamentario Tevreden ta elabora riba e decision di Hof pa loke ta trata matrimonio di mesun sexo. Tevreden ta urgi Gobierno pa bay cassatie y duna pueblo e chens pa vocifera nan opinion berdadero.
Tevreden a sigui bisa cu MEP ta para na banda di e mayornan. Bou di ningun circunstancia ta asina cu e mayornan cu ta preocupa ki sorto di enseñansa nan yiunan ta haya na scol, ta despues ta bin haya sa for di nan yiunan, cu nan a haya e lesa aki na scol.
Segun Tevreden, e no ta di acuerdo cu Hof por dicidi pa henter un pais. E pais aki, nos pais, ta basa riba e normanan cristian den su mayoria, aunke esey no ta nifica cu nos ta un pais liber di pica y tampoco cu nos ta un pais cu ta condena otro estilo di bida. Pero esey ta nifica cu nos ta autonomo y cu nos mes por dicidi di cambia nos tradicionnan y e ruta di nos pais.
Ta obligacion di Gobierno di atende cu e caso aki den Cassatie, cu ta e caminda pa cana. E lo duna un oportunidad pa pueblo por vocifera su contento of malcontento cu e ponencia di hof.
Parlamentario Marco Berlis tambe a expresa su pensamento tocante e veredicto di Hof, unda cu e ta expresa cu no tin nada contra di personanan homosexual, pero cu no por impone esaki riba e muchanan. Y e ta lamenta cu esaki a tuma luga, unda cu e scolnan ta duna e muchanan les cu ta condiciona nan mente.
Pa loke ta e decision di hof, Berlis a expresa cu si habri porta pa esaki, e ora lo mester habri porta pa tur otro cos cu lo bin den futuro. El a menciona como ehempel, e presentacion di e Cashi Magico, unda cu a hiba e muchanan di scol basico bay wak e presentacion aki. Esaki ta algo totalmente cu e no ta di acuerdo cu ne, ya cu no e mayornan no tabata di acuerdo cu e contenido di loke a presenta. Esaki ta algo cu no por acepta. Despues a bin haya su cu e dos personanan cu a permiti esaki, ta homosexual.
Berlis no tin nada contra di niun persona homosexual, ya cu cada persona adulto por scoge su preferencia sexual, ya cu nan tin e madurez pa sa kico nan kier haci cu nan bida y esey ta nan derecho. Pero ora cu ta bin cu lesnan cu ta toca un mucha, cu apenas ta den desaroyo y cu ainda ta den e mundo di hungamento, cu no por pensa ainda riba e nivel ey, ta bin cu les cu ta condiciona nan mente, ta totalmente inaceptabel.
Pa loke ta e decision di Hof, ora cu el a dicidi pa habri Aruba y Corsou pa local ta e matrimonio homosexual, mester compronde bon, den su totalidad, kico tur ta invita den nos sociedad. Pero loke mester compronde ta cu kier wak e futuro di locual ta e desaroyo di LGBTQ + na Aruba, mester djis wak un rato na Canada, Merca of Hulanda, kico ta pasando n’e paisnan aki.
Marco Berlis a urgi Gobierno, cu ainda no a vocifera nada riba e ley aki, kico nan ta bay haci, pa informa pueblo kico ta bay haci y con ta bay hacie, tambe ki ora ta bay hacie.
