Fraccion di POR a presenta 8 mocion na bienestar di pueblo den Parlamento

Den e prome dos dianan di reunion publico den Parlamento pa trata prespuesto di Pais Aruba pa aña 2018, Fraccion di POR, conhuntamente cu e partnernan den coalicion tabata hopi activo y a presenta varios mocion pa siribi interes di nos isla y nos hendenan.
E mocionnan presenta te na e momentonan aki ta relaciona cu vivienda social pa nos grandinan y esnan cu limitacion, vivienda pa esnan cu handicap multiple, pa tin mas polis, un gevaren premie pa esnan cu ta risca nan bida tur dia na bienestar di Aruba, bin cu un Sistema confiabel di rijbewijs, mayor atencion pa e sector social, pa logra yega na un miho directiva pa Parke Nacional Arikok y pa esnan cu a cumpli cu nan castigo cera den KIA por logra haya un carta di Buena Conducta ora ta aplicabel.
Bayendo un poco mas den detaye por menciona kico cada un di e mocionnan aki ta urgi Gobierno pa haci, asina comunidad por ta na altura con e dos parlamentarionan di POR sosteni pa e otro fraccionnan den coalicion ta boga pa logra un mihor futuro pa nos isla y nos ciudadanonan.
A urgi gobierno pa haci e tramitenan necesario pa e casnan bashi di e Centro di Cuido na Palisiaweg na San Nicolas por wordo poni disponibel den e menor termino posibel di tempo pa por sirbi como vivienda pa esnan cu handicap multiple.
A urgi gobierno pa evita cu e problemanan entre e trahadornan y e actual directiva di Parke Nacional Arikok sigui aumenta y tuma e pasonan necesario pa por logra un directiva cu por conta cu e sosten di gobierno, sindicato y trahadornan y cu ta bela pa e bienestar di Parke Nacional Arikok.
A pidi gobierno pa den e plannan di construccion di 200 vivienda social of popular inclui un porcentahe di 15% di e total specialmente pa nos grandinan y pa personanan cu limitacion.
A urgi gobierno pa den e menor termino posibel yuda implementa e Defensor di Pueblo y Defensor di Mucha, mientras cu ta reforsa, Departamento di Asuntonan Social pa por brinda mas asistencia na famianan den necesidad, ta reforsa e posicion di centronan di bario como pilar di convivencia den nos comunidad y ta reforsa e Multidisciplinair Centrum (MDC) pa por duna mas asistencia na muchanan cu problemanan di comportacion.
A pidi gobierno pa studia e posibilidad pa esnan cu a sinta un castigo di por lo menos dos aña y cu a demostra un bon conducta durante nan castigo por haya un documento cu ta demostra nan bon conducta, pa por solicita y bin na remarke pa haya trabou den areanan predetermina.
A urgi gobierno pa haci e estudionan necesario pa mira e posibilidad di haci uzo di e aplicacion CAS (uza pa Registro Civil) pa trahamento di rijbewijs y di e forma aki sigura e confiabilidad di datonan di e persona pa mantene e nivel di confiansa di e documento aki tanto local como internacional.
A pidi gobierno pa bin cu un ‘Gevaren Premie’ pa luna riba salario di esnan cu ta cay bou categoria di Algemene Opsporingsambtenaar y di esnan cu ta cay bou categoria di Bijzonder Opsporingsambtenaar, Douane Recherche, Personal di CEA den KIA y Bewakers di KIA den e menor tempo posibel.
A urgi gobierno pa mira e posibilidadnan pa recluta mas polis y promove entre nos hobennan e estudio pa bira polis y asina amplia nos Cuerpo Policial logrando e meta di tin mas polis riba caya.
Dialuna awor lo continua cu tratamento di presuesto y pueblo por ta sigur cu fraccion di POR lo presenta mas mocion teniendo na cuenta interes di cada ciudadano cu ta biba riba nos isla.