Den gangnan di aeropuerto ta mencionando cu e compania Aruba Airport Authority N.V. lo tin intencion di kita entre 50 pa 60 trahado den e siguiente simannan. Un ke otro tin di haber cu e realidad financiero-economico cu tin awendia, esta cu e mercado di turismo, mara na cantidad di pasahero cu ta pasa via nos aeropuerto a baha drasticamente. Financieramente e compania no por sigui carga e gastonan di personal manera cu nan ta awendia, pa cual lo reorganisa y den e proceso, baha su gastonan di personal.
Pero, Gobierno di Aruba, aunke cu presidente di e Hunta di Supervision di Aruba Airport Authority, esta Marion Kan, ta representa Minister Dangui Oduber den directiva, toch a manda un carta den cual ta prohibi pa kita trahado for di trabou. Ta parce cu eynan tin un discrepancia, o sea cu Gobierno y su representantenan den e Hunta di Supervision no ta riba e mesun liña di pensamento relaciona cu e realidad di con ta baha gasto.
Awor e situacion a empeora, pasobra por lo menos un di e sindicatonan, esta Sindicato di Trahadonan di Aruba (STA) a bay di acuerdo cu e protocol y pakete presenta riba mesa dor di gerencia di Aruba Airport Authority. Diabierna tabata obvio cu STA y FTA no ta riba e mesun liña tampoco pa e pakete cu tin riba mesa. Esey mes a haci cu un grupo di trahado a dicidi di acerca Fraccion di MEP den parlamento pa un reunion.
Awe e parlamentarionan a topa cu e grupo di trahadonan aki na Club Caiquetio. Ey a scucha nan preocupacionnan, nan inkietudnan y nan keho contra e forma un poco obligatorio cu kier forsa nan pa yega na un acuerdo. Mañan dialuna lo inicia reunion individual cu tur trahado di aeropuerto. Ya caba 27 trahado a tuma un pakete boluntario y awo lo kier obliga riba 50 trahado pa nan acepta un pakete y busca otro trabou. Nan ta sinti cu gerencia ta actuando den forma dictatorial y cu gobierno ta paga subsidio di salario pa no kita hende fo’i trabou pero cu gobierno mes, via Aruba Airport Authority NV, no ta duna un bon ehempel.
Parlamentario Rocco Tjon a bisa despues di e encuentro cu e trahadonan, cu parlamento awo tin un miho bista di e preocupacion cu ta biba bou di e personal. Parlamento ta na altura si cu minister Dangui Oduber a manda dos carta pa Aruba Airport Authority riba e tema aki. Den ambos carta e mandatario cu ta representa e accionnan di pais Aruba den e compania, a instrui e compania pa reorganisa cu retiro boluntario y no obligatorio. Tambe e minister a expresa cu e ta sinti cu ta miho pa pospone e reorganisacion te ora cu tin cifranan y proyeccionnan concreto riba mesa, pa sa cuanto mester economisa.
Pa Rocco Tjon, reorganisacion no ta malo pero kitamento di hende for di trabou si. Parlamento tin herment cu por uza pa wanta e plannan aki di gerencia di aeropuerto y asina evita cu ta manda trahadonan masalmente asina riba caya. “Mi ta kere cu un reorganisacion, si ta pa motibo di finansa, den e caso aki, ta hopi importante pa Bo tin bo proyeccionnan financiero haci. Bo tin e punto na unda lo bo kier yega como organisacion, cuanto bo mester bezuining. Ta hopi punto cu Bo mester tene cuenta cu ne y mi por confirma cu fraccion di MEP a haci diferente pregunta na gerencia y sindicatonan y ningun por a presenta proyeccionnan haci”, asina e parlamentario a termina bisando.
