Fraccion di AVP: Prome Minister a entrega nos pais na Hulanda

1738

Despues cu a suspende e reunion den Parlamento pa tempo indefini, varios miembro di fraccion di AVP a hiba palabra, entre otro parlamentario Richard Arends, como tambe lider di fraccion di AVP, Marlon Sneek y tambe parlamentario Benny Sevinger. Nan no a keda contento cu e movecion aki, den cual atrobe Gobierno ta laga Parlamento na mita, sin por fiha un posicion cla riba e disputa cu Gobierno di Hulanda, pa condicionnan impone pa yuda Aruba cu un fiansa di 204 miyon florin. 

Como lider di fraccion, Marlon Sneek a comenta cu e fraccion ta decepciona. Pasobra fraccion di AVP dialuna a entrega un carta na Parlamento, pidiendo pa asina por haya un reunion meramente pa papia riba e tema di Hulanda. Tur hende a keda dek, kere cu cos ta pasa bay, cu tur hende ta na soño. Di dia 17 di juni caba a pidi prome minister kico ta e voorstel cu el a manda Hulanda. E no a contesta e fraccion.

Diahuebs por a mira cu el a haci e mesun cos cu el a haci luna pasa. Luna pasa el a bin, duna su discurso cu e ta duna tur caminda, na cumbre, na reunion cu gremio, bin tira e mesun speech den Parlamento, despues baha na awa.

Luna pasa el a laga Xiomara Ruiz-Maduro contesta y e biaha aki atrobe el a bolbe baha na awa y laga Andin Bikker. Pa fraccion di AVP, e minister aki a entrega e pais aki na Hulanda. Pesey e no por a bin den Parlamento bin duna cuenta, pasobra tur hende a cuestion’e. Di Parlamento, e no tin un aprobacion pa entrega net net nada. Ni un milimeter.

E minister a bisa cu den bida bo tin cu dal un stap patras pa bin bek y e no a bin bek pa contesta. Ainda a keda ward’e. Awor aki presidente di Parlamento tot nader order a bolbe schors e reunion y Parlamento, ni Aruba no a tende unda prome minister ta para. Esey ta locual ta e problema cu tin.

Fraccion AVP ta lamenta ausencia di Prome Minister

Posted by 24ora on Thursday, August 13, 2020

Na momento cu bo ta negoshando riba punt y comma, ta pasobra bo ta cla pa entrega. E minister aki no por sigui gaña e pueblo aki.

Un tema asina importante pa bo pais y a gewoon bay for di parlamento pasobra e tabata tin cos mas importante pa haci. Ora cu a tuma nota di e prome minister su presencia, Sneek a bira emociona. Cu e minister a kibra su cuarentena pa duna cara. Pero a sali bay na final, sin duna contesta y ta algo hopi tristo.

Parlamentario Benny Sevinger a bisa di su parti cu ta hopi decepciona con un reunion asina importante a bay. No ta un dia of ta un aña a dura pa pais Aruba a yega na unda nos ta.

A bringa pa yega na un Status Aparte, cu por cierto e tempo ey lo mester a bira independiente. A bringa pa schrap e independencia pa nos por a haya e Status Aparte. Ta nos por dicidi riba e futuro di e pais aki. Cu bo kier of no, segun Sevinger. Tur gobierno cu a sinta despues di Status Aparte, AVP y MEP, gelapi of so, e pais aki a bay dilanti.

Cu tin problemanan cu mester wordo drecha ainda, esey ta sigur. Mester drecha nan. Awor aki loke ta bay sosode ta, ta bay tin un entidad, un comision di Hulandes sinta na Den Haag, caminda cu Aruba ta bay duna nan e potestad, esta e prome minister aki, ta bay duna nan e potestad pa nan bay dicidi kico ta bay sosode na Aruba.

Si mañan e proximo gobierno dicidi cu ta mira cu tin pobresa door di Covid, ta bay hinca placa den asuntonan social, Den Haag ta bisa cu no. No ta di acuerdo pa bay hinca 20 of 30 miyon den social, pasobra ta haya cu tin cu bay paga debe. Nan ta dicidi esey y e ministernan tin cu firma na e cruz y e Parlamentarionan tin cu grita, ja meneer. Esey ta loke e hendenan aki kier y Sevinger ta sinti cu e prome minister ya a caba a entrega. Tin dos rijkswet riba mesa cu no ta existi pa Aruba. Corsou y St. Maarten ta otro cos. Nan tin rijkswet riba financieel toezicht caba. Nan debenan a wordo paga pa nan a bay di acuerdo cu e rijkswet ey. Nos debenan no ta bay wordo paga.

Nos ta bay fia placa. Hulanda no ta duna nos nada por nada. Bo tin cu pag’e bek. Pero Hulanda kier e potestad di no solamente fiabo e placa, pero dicidi tambe unda e placa ey ta bay. Y Aruba no tin nada di bisa como pais. E ora ta perde e autonomia, ta perde e potestad cu tin pa dicidi unda bo ta bay.