Dialuna a tuma luga un reunion publico den parlamento caminda cu a trata Tourism Product Enhancement Fund (TPEF). Miembro di fraccion di AVP, parlamentario mr. Gerlien Croes a comenta cu algun siman atras a trata TPEF 2022 y a vota contra, pa motibo cu el a haya iresponsabel cu e minister a bin na final di aña pa pidi votacion y aprobacion di e fondo cu el a uza caba.
Awo fraccion di AVP a vota voor p’e presupuesto di TPEF p’e aña aki. E parlamentarionan tin e deber di cuestiona e minister riba locual cu t’e escogencia di maneho. Cu nan ta completamente di acuerdo cu el a scoge ta no. Pero esey no t’e motibo tampoco pa stroba e fondo aki pa uza p’e aña aki 2023.
Croes a sigui bisa cu ta spera cu e minister por bin elabora miho pa locual ta por ehempel e proyecto di conscientisa riba reparticion di sushi na Aruba, mientrastanto cu e infrastructura pa tin esaki haci manera debe ser, mes no tin ainda. Atrobe ta prerogativo di e minister p’e scoge kico e ta haci cu e fondo.
Di parti di parlamentario drs. Mervin Wyatt-Ras, a comenta cu e reunion biaha pasa, esta e presupuesto 2022 tabata laat. Pero e biaha aki a present’e mas trempan. E ora tin cu bisa cu mirando tur e proyectonan cu tin den tapara, fraccion di AVP no tin mucho contra di nan. Aki aya AVP ta critico pa loke ta trata ki proyecto si por pone aden.
Wyatt-Ras mes a basa su mes riba locual cu Raad van Advies a trece dilanti cu tin di e proyectonan ta cay bao di otro ministerio. Tin oneigenlijke taken cu ta haci. Pero, basicamente ta importante, pasobra e ta un ley cu a sali fo’i partido AVP y esey Wyatt-Ras a trece dilanti. Dado momento el a desaroya asina ey y e ora e fraccion di AVP a sostene e ley tambe.
