Fundacion Pa Nos Comunidad (FPNC) ta mirando cu e peticion pa ayudo di comestibel ta subiendo. Esaki ta debi cu ya a cuminsa yuda, unda pa dia ta partiendo 20 pakete. Awo ya tin un aumento basta halto di cual e fundacion ta mira cu e demanda ta sigui subi dia pa dia.
Mayoria biaha ta parti productonan basico cu ta aros, bonchi, pasta, cumindanan cu normalmente nan ta come manera nutritivo. Hopi biaha ta pensa riba e mix vegetable, pero tambe productonan higienico, papel di wc, habon pa baña. Ta productonan basico cu un persona mester p’e por sobrevivi cun’e. E fundacion ta traha cu tur instancia rond Aruba p.e. Departamento di Asuntonan Social, FCCA, Wit Gele Kruis y mas instancia social.
E fundacion a adapta un formulario specialmente p’e situacion di COVID-19, segun Gabriel Marchena, trahado social di Fundacion Pa Nos Comunidad. Den e formulario ta pidi como rekisito cu cada cliente perde trabou, pa bin cu un prueba y demostra esaki cu e ultimo pago di trabou. Tambe nan mester por mustra e carta di retiro cu nan a haya for di e compania di trabou. Tur esaki ta como prueba cu directamente nan a wordo afecta p’e situacion di COVID-19.
E proceso ta asina cu mayoria biaha cu e fundacion haya grupo di cliente asina, nan ta yuda. Fundacion Pa Comunidad ta yuda den e sentido di mas grandi tambe cu ta e ayudo humanitario. Ta tene cuenta cu e derecho humano di ser humano y tambe di e muchananan. Segun Marchena, hopi biaha esakinan ta personanan cu tin mucha den famia. Asina aki e fundacion ta haya nan mes ta yuda e muchanan, pasobra mester tene cuenta cu e derecho di mucha. FNPC ta haya yudansa di comunidad, pero tambe di hotelnan mes, restaurantnan. Tambe ta haya yudansa di CEDE Aruba, Heart-Centered Leadership Foundation di Aruba, cu ta un organisacion cu ta yuda e fundacion colecta comestibelnan cu mester p’e clientenan. Marchena a sigui bisa cu tambe nan ta haya yudansa di comerciantenan local, kendenan ta duna nan aporte durante e situacion dificil aki.
Banda di alimentonan basico, specialmente higiena ta importante mirando cu esaki tin un costo basta halto. E fundacion ta haya cu nan falta mas donacion pa esakinan manera colgate, skeiro di djente, habon di baña, papel di w.c., papel sanitario, pampers, lechi di baby cual nan ta haya hopi peticion p’e. Esaki ta un producto cu prijs ta halto y mester di dje pa por yuda e clientenan.
Fundacion Pa Nos Comunidad ta situa den Emmastraat 16, cu ta T-weg di Wit Gele Kruis direccion pa Kowloon Restaurant y ta keda schuin tegen over e edificio di Aldo Travel. E edificio ta color geel-oranje cu heki berde rond di dje. Tambe por tuma contacto cu e fundacion na 5880002, na nan linea di whatsapp of Facebook page Fundacion Pa Nos Comunidad Aruba mandando mensahe aki.
