Klientenan di Sentro di Detenshon i Korekshon Kòrsou ku ta forma parti di e grupo piloto ku ta siñando pa forma nan mes pa medio di un fishi.
Den e kaso aki ta trata di e fishi di kosturero. Nan tambe a pasa nan di dos periodo di eksámen ku éksito durante e luna di aprel 2018. Durante di e periodo ariba menshoná e klientenan a siña spesífikamente kon pa kose un kamisa grandi i chikí pa hende hòmber. Akinan diferente téknikanan di e fishi di kosturera a bin pa dilanti manera entre otro; dominio di e mashin di kose, kose hasiendo uzo di un patronchi ku nan mes a pinta i kòrta, traha buraku i pega boton i hinka manga i krag.
Di e forma aki Sentro di Detenshon i Korekshon Kòrsou ta sigui hasi uso di e potensialnan den nos instituto. Pa asina kontribuí na un forma positivo den e parti di resosialisashon di nos klientenan. Dor di formanan ku un fishi a base di nan talentonan natural i asina brinda e klientenan e oportunidat di por wòrdu aseptá i finalmente funshoná optimal bèk den nos komunidat.
