Den cuadro di formacion di gobierno nobo, den e dianan aki gabinete Wever-Croes, kende ta formado, a reuni cu tur stakeholder riba diferente tereno. Awe el a reuni cu ATSA, ATIA, KVK y AAA, di cual ta e stakeholder di turismo y economia.
Prome Minister mr. Evelyn Wever-Croes a splica riba nan reunion. E prome tabata ATSA, cu ta e asociacion di Timeshare, y esaki tabata p’e formado di gobierno por a haya un miho bista con nan ta mira e desaroyo di industria aki y kico ta nan punto di bista. Esaki ta p’e gobierno nobo tene cuenta cu ne. A papia cu ATIA, Camara di Comercio y AAA, pero ainda falta varios stakeholder riba e tereno aki. Debi na otro compromiso laboral di e mandatario demisionario, no por a reuni cu mas y p’esey den proximo dianan lo sinta cu otro stakeholder.
E prome reunion tabata cu Aruba Timeshare Association (ATSA), cu a trece ocho punto dilanti. Luigi Heredia, presidente di ATSA, a indica cu pa tres biaha caba nan a sostene Aruba den tempo di problema. nan a logra mantene hopi empleado na trabou y e resortnan a paga durante henter pandemia nan salario. E puntonan cu a trece dilanti tabata ley laboral, Bubali Plas, Beach Policy, educacion, problemanan financiero, desaroyo di Aruba, siguridad, medio ambiente y reciclahe na Aruba.
Aruba Trade & Industry Association a sinta cu formado di gobierno pa asina trece nan punto dilanti. Tristian Every, miembro di directiva di ATIA, a informa cu e reunion a bay bon, nan ta honra y contento di por a participa y contribui na esaki. Pa ATIA tabata importante trece algun punto y yuda desaroya economia. P’asina cuminsa cu e mashin bek manera ta custumbra di tin e.
Omar Tromp, presidente di Camara di Comercio, a indica con importante ta pa forma un gobierno mas lihe posibel y pa tin stabilidad bek como pais. Camara di Comercio lo tabata desea un coalicion mas amplio, pero aworaki ta boga pa forma un coalicion mas lihe posibel.
Joost Meijs, CEO di Aruba Airport Authority (AAA), a splica cu e reunion a bay bon cu formado y riba un manera conservativo a papia di e situacion actual na aeropuerto. A papia riba e parti con e gobierno nobo por yuda nan, pero di otro banda tambe. E ta spera cu por traha na e mesun manera cu a hacie durante e gabinete anterior.
