Tabata tin varios preocupacion cerca e trahadonan di GKMB. Nan ta bisa cu desde cu Minister Dangui Oduber a drenta den gobernacion, nan no a mira su cara y ta preocupa.
E mandatario a splica cu di ora cu a drenta gobierno, a haya un unidad, esta GKMB na Salubridad Publico cu tabata tin hopi preocupacion, hopi problema.
Problemanan cu pa ocho aña largo no a atende cu nan. Ora cu a drenta gobierno a sinta cu SEPPA. A sinta cu e Shopsteward di nan y tambe algun trahado y a repasa full un lista di preocupacion cu nan tabata tin. Tur e problemanan cu a wordo treci dilanti, a duna nan tur e atencion debido, no di awo. Pesey ta lamenta pa tende cu sindicato SEPPA cu ta representa e trahadonan, ta bisa, cu gobierno no ta duna atencion na GKMB, cual den ningun momento ta e caso.
Di ora cu a drenta den gobierno, ta atendiendo for di e momentonan ey cu tur nan preocupacionnan. Un di e preocupacionnan tabata, cu tin promocionnan tranca y cu pa 8 aña no a atende cu nan. A atende cu e promocionnan un pa un y segun minister Oduber, nan ta up to date, pasobra a manda varios corespondencia pa SEPPA y pone nan na altura, cua ta e promocionnan cu ta atende cu nan y si tin bevordering cu no a wordo atendi pa informa, pasobra e procedura ta pa busca conseho na DRH, unda cu a haya conseho, despues pa bay Conseho di Minister pa aproba esaki.
Un di e otro preocupacionnan ta, cu nan no tin auto. Pa ocho aña largo nan no a haya auto pa haci nan trabao. Na e momentonan ey tabata bezig presupuesto 2019. A percura pa presupuesta placa pa no un, ni dos, sino tres auto. A atende cu e preocupacionnan ey di biaha. Otro preocupacion tabata e personal protective equipment, e materialnan cu nan mester di dje pa eherce nan trabao manera debe ser.
A haya varios recomendacion di World Health Organisation, kico mester haci, kico ta e normanan, kico ta e precaucionnan y kico ta e materialnan cu e unit GKMB tin mester di dje pa asina nan por eherce nan trabao.
A trece seis recomendacion dilanti. Di e seis puntonan aki, a cumpli cu cuater di nan. A cumpra un full face respirator, a cambia e tipo di respirator filter, a cambia e handschoennan, a implimenta un procedura. Tin dos punto cu falta pa atende cun’e, ta un test di sanger y tambe un locker cu nan a pidi, cual no ta ningun problema tampoco. Awor aki ta den pleno comienso pa cuminsa trata e presupuesto 2020. Ta bay inclui esaki den e presupuesto pa asina atende cu e preocupacionnan aki tambe.
Un otro preocupacion tabata, cu a haci peticion pa un Gevaren Toeslag. Den nan opinion, nan ta haci un trabao peligroso cu nan ta core riesgo di haya enfermedadnan cu ta wordo transmiti, por medio di sangura cu nan ta atende cu nan. Esaki tambe a atende cu e preocupacion aki. A manda pidi conseho pasobra a bisa nan cu sigur gobierno ta habri pa busca tur manera pa coopera cu nan. A busca conseho na DRH y lamentablemente e conseho den e caso aki no tabata uno positivo.
Ora cu ta tende cu sindicato SEPPA ta bisa cu no ta atende preocupacion, cu no tin atencion, segun minister Oduber, nan lo tin un otro agenda, pasobra tur e puntonan cu nan mes a trece dilanti, tur e puntonan aki a wordo atendi cu nan un pa un, cu e debido atencion, cu e debido respet. A sinta cu SEPPA, a coresponde cu nan, ta contesta nan e-mailnan. Obviamente nan tin un otro agenda of nan tin otro puntonan cu Oduber, como minister, no ta conoci cu nan ainda. Tin di compronde cu diamars mainta nan lo tene un walkout. Por ta e minister lo tende otro punto.
Na momento cu a drenta gobierno, tin bon comunicacion cu e Hoofd van Dienst. Gobieron ta atendiendo cu cada un di e problemanan aki. Ta sinta cu SEPPA na mesa y a lo largo, Minister Oduber no sa mas kico pa haci pa mantene sindicato SEPPA contento.
Durante ocho aña largo, practicamente el a kere cu e sindicato aki no lo ta existi mas, pasobra pa ocho aña largo no a tende di e sindicato aki. Pa ocho aña largo nan no a atende cu GKMB, nan no a atende cu ningun otro dienst, pero diripiente tin un otro signatura di gobierno, diripiente e mesun figuranan, e mesun caranan conoci, cu ta Magali Brito y Edmundo Marlin. E minister ta respeta cada un di nan y sa sinta na mesa. Pero no mester sali pa uza e argumento cu e minister no ta duna atencion na e dienst, siendo cu sa masha bon, cuanto atencion a duna e Unit aki. No solamente atencion, cuanto desicion y accionnan concreto a tuma caba pa atende cu cada un preocupacion.
Si kier sali manifesta, uza un otro argumento. Bisa cu no ta di acuerdo cu e maneho, no ta di acuerdo cu e minister of tin motibonan politico. Pero no uza e argumento atencion, pasobra e atencion tey te dimas. Gobierno ta atendiendo tur siman cu cada un preocupacion pa asina por cumpli cu e dienst. Na final di dia, ta un dienst di gobierno, un dienst cu mester ta ekipa, su personal mester ta contento. Pesey tin cu atende cu cada un preocupacion, pa asina tin un unit den DVG cu ta funciona manera debe ser.
Contrario na tur e ponencianan di SEPPA tin cu refuta cada un di nan y bisa na e trahadonan cu nan por ta trankil, cu gobierno tin oido pa nan preocupacion y ta atende cada un di e problemanan aki manera debe ser.
