Diahuebs atardi, a bati alarma cu e Jet Fuel di Fuels Marketing & Supply Aruba (FMSA) no a pasa un test cu aeroliñanan ta haci regularmente. FMSA semper ta practica siguridad y den e ultimo 32 añanan semper a cumpli cu tur norma di aviacion internacional.
Durante un prueba tabatin indicacion di un variacion leve y mesora a tuma accion pa tuma tur precaucion necesario. Como consecuencia di esaki, a recomenda algun vuelo pa fuel na Corsou y tambe na Boneiro.
Cu esaki FMSA ta declara cu no tin contaminacion den Jet Fuel. E operacion completo di FMSA a traha diligentemente hunto cu inspectornan independiente pa haci test riba tur e tankinan di aeropuerto, CITGO y distribucion, pa confirma cu e Jet Fuel di FMSA ta cumpli cu tur e normanan internacional di aviacion.
Mester remarca cu FMSA a comunica na tur aeroliña cu lo continua cu operacion normal. E mision y balor di FMSA ta pa opera den un manera sigur y confiabel, cu ta inclui control di calidad.
