Flanèl hel di ‘fighters’ pa pashènt di kanser

147

Pa e edishon di 2018 fundashon Ride for the Roses a introdusí ku spònser prinsipal Orco Bank i e ko-spònsernan Glacial i Compliance & Forensic Services Caribbean un flanèl nobo, hel – e asina yamá flanèl pa ‘Fighters’ – pa partisipantenan spesífiko: esnan ku aktualmente ta bou di tratamentu di kanser i den esei por usa sosten.

Su teksto ta: ‘Fighting together! No one has to fight alone!’. Pa uso general durante e diferente elementonan di Ride, Swim, Sail en Walk for the Roses tin e konosido T-shirt blanku, e aña aki ku e logo nobo. For di algun aña tin tambe un flanèl kòrá, pa e survivors, ke men esnan ku a sobrebibí kanser. E grupo ei por disidí pa partisipá òf nan ta kompañá otro sobreviviente i un delegashon di Fondo Prinsesa Wilhelmina pa animá e partisipantenan di Walk for the Roses den nan último trayekto te na e final na Mambo Beach/BLVD. E flanèl nobo ku a introdusí awor ta pa hende ku na e momento aki ta den nan lucha kontra kanser i ku por usa respaldo di esnan rondó di nan i otronan aya ‘fó. No den tur kaso e personanan aki, tambe a konsekuensia di e intensidat di e  tratamentunan, tin e forsa físiko i e kurashi pa desplegá un esfuerso físiko grandi asina.

Den e kaso ei nan tambe por djòin e grupo di survivor i e delegashon di PWF na Mari Pòmpun. Niun hende no tin nodi hiba e lucha e so i e grupo aki por inskribí tambe na PWF i danki na Ride e flanèl ta grátis. Ku esaki fundashon Ride for the Roses ke logra, tambe despues di a konsultá PWF, pa kibra ku e tabú ku ta eksistí ainda serka esnan ku pa motibu di e malesa ta kai den un sorto di isolashon, pasobra nan no ke pa otronan sa mes. Si laga otronan sa ku nan ta meimei den e lucha kontra kanser, den tempunan difísil di tratamentu esun envolví por haña mas sosten i komprenshon di esnan ku ta rondon’é.