FitchRatings a “downgrade” Aruba pa “Junk”

6771

E agencia di evaluacion FitchRatings a downgrade Aruba di un rating “BB” pa un “BBB-” cu un outlook negativo pa futuro pa motibo di e caida den actividad economico, deterioro riba tereno fiscal, como tambe cuenta externo. Cu e accion aki Aruba su rating por wordo categorisa como “junk status” cu un grado halto di speculacion y incertidumbre pa cu perspectivanan financiero y economico. Esaki ta nifica automaticamente cu acceso pa Aruba haya prestamo riba mercado internacional ta bira hopi mas dificil y costoso na momento di pidi fiansa, como tambe fiansanan existente.

FitchRatings a indica cu e debe nacional den comparacion cu nos economia (debt/GDP) lo subi pa 92.6% na 2020 for di 62.8% na 2019. Pa a duna e rating aki, e agencia di evaluacion ta asumi cu un tipo di sosten financierio for di Hulanda lo bin. Sinembargo, ayera a sali na cla cu CAft a conseha pa fia Aruba solamente 42,8 miyon florin como asistencia financiero inicial.

E rating di “BBB-” por sigui baha si asistencia financiero di Reino Hulandes no materialisa su mes den forma significativo. E downgrade aki por sigui cu un caida si Gobierno no logra stabilisa of reduci e debe nacional y cu reservanan di divisas sigui disminui y asina deteriorando credibilidad y balor di nos florin.

https://www.fitchratings.com/research/sovereigns/fitch-downgrades-aruba-ratings-to-bb-outlook-negative-08-04-2020

E agencia ta premira un paralisis den turismo y e medidanan cu cuarentena y lockdown lo causa un caida adicional di 10% den nos GDP den termino real, como tambe un aumento dramatico di desempleo y limitacion di actividadnan economico di empresanan mediano y chikito. Tambe ta premira un deterioro di e cuentanan coriente cu 15% compara cu GDP. Pa por mantene balor di nos florin, Banco Central recientemente a restringi control di capital, manera prohibicion riba transferencianan di capital pa exterior. 

FitchRatings ta premira ademas un deterioro severo di finansas publico door di un caida profundo den turismo y consumo cu ta wordo refleha den un caida di entrada pa Gobierno, como tambe aumento di gasto door di creacion di fondonan pa asistencia y alivio. E posiblidadnan di un crecemento economico ta hopi abou na e momento aki; esaki lo limita un consolidacion riba tereno fiscal y reduccion di debe.