E acusado Jossy Loaiza (26) ta nenga di a viola (rape) su ex-pareha dos bes, manera su ex a bisa den su denuncia. Fiscal ta kere mirando tur e circunstancianan, pero prueba no tin pa conden’e. Mester a declar’e liber di dos acusacion. Pero si a conden’e pa maltrato y intento di violacion.
Diabierna den presencia di e denunciante, hues a trata e caso unda cu fiscal a presenta tres acusacion contra dje. 1) den luna di augustus 2021, un of mas biaha, el a viola su ex-pareha haciendo uzo di violencia of menasa; 2) Esaki a sosode tambe entre 23 y 28 di augustus 2021; 3) el a maltrata su ex-pareha y a trata di viol’e.
E acusado ta admiti di a ranca cabey di e muhe. E dia di e sucedido el a yega for di trabou cansa y el a dal tres drinks cu alcohol. E muhe no tabata contento cu el a bebe y a surgi un discusion. E muhe a dal’e y el a ranca su cabey y push’e. Nan a discuti hopi te ora cu e muhe a bay pafo. El a cay drumi banda di su yiu riba cama. El a lanta bek ora cu polis a yega den camber.
E hecho aki a sosode durante toque de queda. E fiscal no por a splica di con e echo aki a sosode aña pasa y t’e e aña’ki nan a detene. Esaki pasobra e no tabata e fiscal aki cu a atende e caso prome cu el a yega Corte. E homber dilanti hues a splica cu door cu tabatin Toque de Queda e no por a bay su cas y e muhe no tabata kier pa e bay cu e auto pa cual polis a bah’e na cas di su mama.
Na polis e victima a declara loke a pasa e anochi ey cu su ex-pareha y dos otro biaha unda cu e homber a tene relacion sexual cu ne forsa, sin cu e tabata kier. El a splica den su denuncia cu e tin miedo di e homber, kende tabatin dos trabou y tin un salario mas hopi cu ne. E homber tabata menas’e cu e lo kita e muchanan for di dje.
E pareha tin dos yiu, un di dos aña y e otro e tempo ey tabata un luna bieu. E di tres biaha cu e homber a trata di tene relacion sexual contra su boluntad, el a dicidi di graba loke tabata pasando y a manda esaki pa su amiga, kende probablemente ta esun cu a yama polis. Hues a lesa transcripcion di e grabacion aki unda por a scucha con nan ta papia bruto cu otro y e muhe ta bisa cu e lo no lag’e viol’e atrobe. E ta bis’e cu si e no kier e relacion sexual y hacie toch, esey ta violacion. Pa cual e homber ta contest’e cu e tabata gusta ora cu e c… y a yam’e pa prostituta.
Di e sucedido di e dia ey, e denunciante ta bisa cu el a fada loke e homber tabata haci cu ne y el a core bay den cushina coy un cuchiu. “Mi tabata kier a hinc’e pero finalmente mi no a hacie. A cort’e solamente na su man.”
A scucha amiga di e denunciante, kende a splica kico el a mira y scucha di e grabacion cu despues el a entrega na polis. Fiscal den su rekisitorio a bisa cu e violacion aki a tuma luga aña pasa. Aunke nan tabata pareha, un relacion intimo contra boluntad di e otro, ta keda violacion sexual. “Mi no tin motibo pa duda den declaracion di e denunciante. Pero den e caso aki mi no tin un prueba di apoyo pa pidi condena pa e homber. Ta declaracion di e denunciante contra esun di e acusado. Nada mas no tin,” e fiscal a admiti dilanti hues. El a haci un apelacion na e victima pa haci denuncia asina cu e echo sosode, pa husticia por actua. Den e caso aki no tin otro testigo.
E victima den e caso aki a declara cu el a fada di e situacion cu e homber, kende tabata acus’e di a gañ’e. Pero e no tabatin otro caminda pa bay cu su yiunan. E tin miedo pasobra e homber ta gana mas placa cu ne y fiscal ta haya cu e homber a abusa di e situacion aki. Normal den casonan asina Hof ta pidi un castigo di 3 aña. Pero como no por proba e dos acusacionnan di violacion, el a pidi un castigo di 24 luna di cual 6 luna ta condicional y 2 aña di prueba.
Hues a cera tratamento di e caso y mescos cu fisca,l no a haya e dos kehonan di rape proba. Unico cos cu tin ta e denuncianan. E otro acusacion si ta proba. Tin e proces-verbaal traha di e polisnan cu a bay na e cas, nan a splica e estado emocional den cual a haya e señora yorando y tambe tin e yamada via whattsapp den cual e testigo a scucha loke tabata pasando entre e dosnan. “Bo no mester obliga bo pareha pa tene relacion sexual si e no kier.”
Hues a bisa cu normalmente den casonan di violacion sexual no ta duna castigo condicional, pero a tene na cuenta e rapport di Reclassering, p’esey a bay di acuerdo cu un castigo mescos cu fiscal a pidi esta 18 luna (un aña y mey) di prison. Banda di dje a laga seis luna di prizon keda colga riba cu cabes como castigo condicional si acaso e bolbe comete e mesun delito den dos aña di tempo.
