Tabata un diahuebs atardi, dia 7 di december 2017, apenas algun siman despues cu Gabinete Weever-Croes a asumi poder, cu Recherche, riba ordo di Fiscal di Ministerio Publico, a detene nos colega Marko Espinoza, kende te cu luna pasa tabata traha den e departamento di prensa di Gabinete Mike Eman II. E gobierno nobo a acuse di ladronicia di ekipo of computernan di trabou. Den oranan di anochi a encarcel’e y a hib’e Warda di Polis San Nicolas. Diabierna ultimo Husticia a inform’e cu nan no ta persigui’e mas den e caso ey pasobra e pruebanan presenta dor di Gobierno no ta suficiente.
Cu esey, Ministerio Publico a pone un fin na persecucion politico di parti di e Gobierno na mando. Probablemente Gobierno a corda cu e repercucion cu nan acto ta bin cune pa e bon nomber di Aruba y di Reino Hulandes dilanti cara di mundo, pasobra lo informa Sociedad Interamericana de Prensa (SIP) di e acto bergonsoso aki!
Loading…
Reload document 
Open in new tab E caso tin di haber cu e keho di Gabinete Wever-Croes, cu falta computer y/of ekiponan pa traha cune. Ta obvio cu MEP no tabatin conocemento di ki ekipo tabatin of laga. Henry Baarh a haya un lista di tur loke a keda atras y a hib’e den e oficina unda tur cos tabata warda na yabi, di henter Bestuurskantoor. Arleen Oduber a haci e keho falso aki contra Marko Espinoza, uzando un Venezolano ilegal, cu hasta a declara na Polis, y ta aparece den e proces-verbaal, cu coordinador di Minister Otmar Oduber (cu tambe ta un Polis) a bise cu si e declara contra Marko Espinoza, cu Minister Oduber lo regla su permiso di estadia y trabou pe!! A cera Espinoza 6 dia largo den prizon y despues a lage bay, a dune tur ekipo bek.
Asina mes mester a paga abogado pa bringa e caso pa por a logra su libertad, debi na su encarcelacion. Tur esey sin conta e dianan cu e no por a traha, e persecucion cu a sigui despues di parti di Gobierno mes y e coordinadornan di Gobierno cu a lastr’e dia den-dia afo riba Facebook. E propio Ministernan a informa y sigura cu tin hopi prueba y cu Espinoza lo a hiba ekiponan su cas, etc. Awo tur esey a cay na awa ora cu Fiscal T. Akkerman a ripara cu na Aruba politiconan ta hunga e weganan aki pa cera contrincantenan.
Pero aunke cu pa Marko Espinoza esaki ta un alivio, dor cu Fiscal a “seponeer” e caso den su contra, cu awor e procedura civil lo inicia. Sea di berdad Husticia a ripara cu e caso aki ta fabrica, of…nan a ripara cu den e proces-verbaal e unico testigo ta compromete Minister Otmar Oduber y su coordinador di fam Wernet. Awor defensa di Marko Espinoza lo mester evalua e daño material y imaterial cu el a sufri dor di persecucion politico, pa por cuantifica esaki den un demanda.
Siendo miembro di Nederlandse Vereneging van Journalisten (NVJ), lo informa nan tambe di e “modus operandi” di Gobierno di Aruba pa persigui periodistanan den nan afan pa silencia libertad di expresion of pa tuma vengansa debi na color of preferencia politico. Cualkier hende lo no por imagina cu den Reino Hulandes nan por cera un miembro di prensa pa 6 dia den cel y despues manda bise cu nos no ta persigui Bo mas pasobra no tin prueba contra Bo.
Ey ta demostra e presion cu Gobierno, lesa Evelyn Wever hunto cu of tolera pa Minister Andin Bikker, pa maluza Ministerio Publico pa haci e tipo di maniobranan asina cu awor ta laga nan mesun imagen na suela!
