Fiscal: E culpabel di intoxicacion den Latin Passion Bar mes a muri tambe

Ministerio Publico a tuma un decision den e investigacion di e sucedidonan di dia 22 di juli 2020 na Latin Passion Bar na San Nicolas, unda dos persona a fayece y dos a resulta herida. Un di e personanan cu a fayece tabata e beheerder di e bar. Despues di 4 luna di investigacion, Fiscal a tuma un decision den e caso aki, esta cu no por papia di un crimen y cu ta cera e caso aki tambe.

Investigacion a mustra cu e dos personanan a fayece a causa di intoxicacion pa monoxido di carbono (koolmonoxide, CO-vergiftiging). Ora cu polis a yega e luga a topa cu un scenario masha spantoso, cu cuater hende na suela, di cual dos tabata morto.

E yiunan di Mia Figaroa tabata inconsolabel dia di entiero di nan mama. Ora cu ningun hende kier a scucha nan of duna nan atencion, a yama 24ora.com pa anuncia pa henter Aruba cu nan NO kier pa dera nan mama pasobra nan tabata convenci cu e mama a muri asesina. Nan a mira e curpa sin bida di nan mama, cu tabata maltrata y hopi marca na su cara. Nan tabata sigur cu un hende a drenta maltrata nan mama y despues mat’e. E dia ey nan no a dera mas y aunke a purba pa autoridadnan a haci un di dos autopsia, toch nan no a logra.

Ayera e fiscal cu tin e caso a tene asina yama slachtoffergesprekken cu famia di e victimanan pa pone nan na altura di resultado di e investigacion. Tur cos ta mustra cu e monoxido di carbono tabata procedente di e motor di combustion di e generador cu tabata uza pa tin coriente den e lugar. Dor cu portanan di e bar tabata cera e anochi ey, e gas toxico a yena e luga.

Dia 22 di juli ultimo pa 1:30am Dr. Texier a constata morto di Maria “Mia” Figaroa di 47 aña di edad. E ta mama di dos yiu muhe y dos yiu homber. Mia ta yiu muhe di ex-Polis Lou Figaroa, cu semper a biba cerca di Warda di Polis bieu di Noord mes. E otro morto ta G. “Tio” Lopez di 42 aña di edad. E tabata biba na Hulanda pero a bin Aruba y como cu e no tin luga di keda, a regla pa e traha y biba den e bar na San Nicolas.

Pero ta resulta cu a adverti e beheerder na tres diferente ocasion dor di personanan, entre nan un instalado y tambe e doño di e bar, contra uzo di e generador na e forma aki. Asina mes el a opta pa toch sigui uza generator pa por suministra coriente den e bar. 

E dos amiganan Jessica Sousa y Joslyn van der Linden tabata den e luga y tambe a intoxica. Cu urgencia a hiba nan Hospital unda nan a keda interna pa tratamento medico avansa. Despues di algun dia nan a sali y a recupera satisfactoriamente. Nan no ta corda exactamente kico a pasa pasobra nan a perde conocemento den e luga.

Ministerio Publico a subray cu di ningun manera a sali for di e investigacion cu e hendenan den e bar a perde nan bida door di un crimen. E unico cu posiblemente lo por a wordo apunta como esun responsabel, mes tambe a fayece. Ministerio Publico a termina e caso.