Awe Corte den Prome Instancia di Aruba a trata e casonan contra e sospechosonan Gabriel Martin y Risheila Frans. E casonan aki ta sali di e investigacion cu e codename ‘Speeltuin’. E investigacion a cuminsa riba 22 di november 2017, despues cu dokternan a constata cu e mucha homber Rishandroh di 5 aña di edad tabata severamente maltrata. Dos dia despues Rishandroh a fayece a consecuencia di su heridanan.
Den curso di e investigacion a constata cu Eugene di 3 aña di edad, ruman homber chikito di Rishandroh, tambe tabata morto. E curpa di Eugene a wordo haya riba indicacion di Gabriel Martin mes. Despues a determina cu a dera Eugene riba 27 di september 2017.
Eugene y Rishandroh tabata yiunan di Risheila Frans. Como pareha di Risheila, e muchanan tabata cay tambe bao cuido di Gabriel Martin, kende awor Husticia ta persigui pa homicidio di Rishandroh y Eugene y pa maltrato serio di e dos mucha hombernan den e periodo prome cu nan fayecimento, mientras cu e muchanan tabata cay bao di su cuido. E periodo aki a start na augustus 2017.
Banda di e hechonan aki Gabriel M. ta wordo persigui tambe pa e maltrato di Risheila Frans pa añanan largo y pa a dera curpa di Eugene pa evita e descubrimento di un crimen.
Di otro banda Risheila Frans ta wordo persigui pa medeplegen (comete hunto) of medeplichtigheid (complicidad) di e homicidio di Rishadroh y Eugene y e medeplegen of medeplichtigheid di maltrato severo di e muchanan den e periodo prome cu nan morto, mientras cu e ta mama di e dos muchanan. Ademas ta acusa Risheila di a duna su yiunan insuficiente proteccion.
Ministerio Publico a exigi pa Hues condena Gabriel Martin pa homicidio di Eugene y Rishandroh. Ademas a exigi pa Hues conden’e pa maltrato severo pa tempo largo di Eugene y Rishandroh, pa maltrato largo di Risheila y pa sconde e curpa di Eugene. E castigo maximo pa e delitonan aki ta di 20 aña di prison.
Expertonan a determina cu Gabriel Martin ta “verminderd toerekeningsvatbaar”, por wordo teni menos responsabel pa su actonan, tempo cu el a comete e hechonan. Pa yega na e castigo exigi contra dje, Ministerio Publico a studia casonan comparabel y circumstancianan cu lo por haci e castigo mas pisa of menos pisa.
Ministerio Publico a exigi un castigo di prison di 15 aña contra Gabriel Martin. Un di e consideracionnan tabata cu Ministerio Publico ta haya necesario cu banda di e castigo di prison mester tambe impone un medida contra su libertad.
Pa e rasonnan aki Ministerio Publico a exigi Hues pa impone un castigo di prison y e medida di TBS (terbeschikkingstelling = poni na disposicion di Gobierno) cu tratamento obligatorio (dwangverpleging). Expertonan riba tereno di comportacion humano a determina cu Gabriel ta sufri di un disturbio di personalidad. Ademas e expertonan ta kere cu e peliger cu Gabriel ripiti delitonan di violencia grave ta sumamente halto, si e no wordo trata. Mirando cu Gabriel a nenga yudansa cu a wordo ofreci na dje den pasado y pa motibo di e peligroso cu e ta, ta indicativo pa tratele den un clinica cera.
E medida di TBS ta posibel na Aruba desde introduccion di e Codigo Penal nobo na 2014.
Si Hues dicidi pa sigui e exigencia di Ministerio Publico, anto lo ta prome biaha cu TBS ta wordo imponi na Aruba. E meta di e medida di TBS cu dwangverpleging no ta solamente pa trata Gabriel M, pero tambe pa proteha sociedad contra dje. Personanan cu a haya TBS cu dwangverpleging ta sali den libertad unicamente despues cu expertonan conclui cu e peliger pa nan ripiti nan hechonan a baha pa un nivel aceptabel pa seguridad di sociedad.
Den e caso contra Risheila Frans, Ministerio Publico a exigi pa e wordo declara liber di e homicidionan y di e maltratonan severo.
Ministerio Publico ta haya cu e mester wordo condena pa complicidad na comete e crimennan aki y pasobra el a keda sin ofrece seguridad na e muchanan. Ministerio Publico a exigi un castigo di prison di 4 aña, di cual 1 aña ta condicional. Na e parti condicional ta mara tres condicion particular. Esta, cu e ta keda bao supervision di Reclassering, cu e ta haya tratamiento y cu e ta prohibi pa tin contacto directamente of indirectamente cu Gabriel Martin durante e tempo di prueba di 3 aña di tempo.
E castigo di prison cu Ministerio Publico a exigi contra Risheila Frans ta bastante mas abao cu esun exigi contra Gabriel Martin. E motibo ta cu e mes no a maltrata of a mata e muchanan. E ta wordo acusa si di a duna Gabriel oportunidad pa maltrata e muchanan severamente y mata nan. Ministerio Publico ta di opinion cu Risheila mester a tene e muchanan leu for di Gabriel una vez el a haya sa cu e tabata maltrata nan. Esey sigur cu Rishandroh despues cu Eugene a muri. A inclui den e exigencia tambe cu Risheila mes pa hopi tempo tabata victima di Gabriel Martin. Risheila ta ademas un ‘first offender’.
Hues lo dicta sentencia dia 6 di juli proximo dene caso contra Gabriel Martin. E caso contra Risheila no ta cla ainda y como tal no tin fecha pa sentencia.
