Awe corte a trata diferente caso y un di e casonan ta di e asesinato di Sayuri Petronia. Den caso di e sospechoso Izak Principaal fiscal a pidi pa aplica ley di adulto. A pidi pa diesun aña mas TBS (terbeschikkingstelling), mientras a pidi pa Zuriel Celaire a pidi toepassing jeugdstrafrecht y dos aña di PIJ, cera den internaat.
mr. Demis Illes, abogado, a splica cu mainta nan a cuminsa atende e caso, pero tabatin momento di pauze. Pa 2:00 pm e caso a continua, unda e defensanan a cuminsa pleita. Mainta a cuminsa repasa loke tabata falta e persoonlijk omstandigheden di e dos sospechosonan. Ya caba por a tende kico fiscal a pidi, pero despues di pauze tabata turno di defensa.
Na varios ocasion a pospone e caso di Sayuri Petronia, pero asina mes hopi di e amigonan a presenta. E abogado a comenta cu su cliente Celaire no ta acusa di tin algo di haber cu e caso di Sayuri. Por a mira cu basta familiar tabata presente, incluso tabatin presencia di e familiarnan dje sospechosonan. Den caso di Celaire, fiscal a pidi pa leg op e PIJ maatregel conforme e conseho dje expertonan di conducta. PIJ maatregel ta un medida pa purba resocialisa, reeduca e persona pasobra e ta jong ainda.
Segun Illes, den e caso aki den palabracion cu cliente y su mayornan, cu semper a cuid’e, nan a bisa caba di nan banda no ta bin protesta pa bay contra esey. Al contrario nan kier pa yega na esey p’asina e por haya un chens den bida.
Den e caso di Sayuri si ta papia di tabata algo accidental of no premedita, fiscal ta convenci cu no por papia di fout na momento di hunga c’un arma. Tambe e fiscal a bisa di no por papia cu tin bewijs, di no tin evidencia, cu tabatin un plan of algo. Pero opinion di e fiscal ta, cu no ta un fout a wordo cometi.
Mike Petronia, tata di Sayuri, a indica cu mester warda kico e sentencia final lo ta. Fiscal a haci su trabou, pero e tata nunca lo ta satisfecho pasobra e no lo haya su yiu bek. El a sigui indica cu fiscal a declara cu tin hopi arma di candela. Nan sa cu e problema di arma di candela ta hopi grandi. Mester haci algo, pasobra mientras ta para keto no ta haci nada. Petronia ta haya cu mester haci algo pa pone un stop n’e armanan di candela cu tin na Aruba. “Awe ta mi yiu, mañan por ta cualkier otro hende su yiu”, tabata su palabra.
Corte lo dicta sentencia dia 15 di juli.
Pa mas lesa TREMPAN.COM.
