E sosten di abogado mr. Milaynie Kelie na warda di polis di Shaba no tabata suficiente pa fiscal mr. Rianne Wilderman por a dicidi di laga Kevin Wever, yiu di minister-president mr. Evelyn Wever-Croes den libertad. A opta pa prolonga su detencion mesora awe y a transport’e pa ward’i polis Santa Cruz unda e lo keda encarcela pendiente e investigacion contra dje.
Kevin Wever tabata meti den un pelea na luna di november ultimo, unda a bringa y kibra muebles den Gusto Cafe y despues Azia Restaurant. A bay entrega keho su mañan contra e rumannan Williams, yiu di Michael Williams di partido PUEBLO PROME. Wever a pasa como victima den e caso di agresion, bisando cu e rumannan lo a maltrat’e di trincion y sin motibo. Pero e pruebanan cu a sali despues, banda di declaracionnan di testigonan y imagennan di video ta mustra contrario na declaracion di Kevin Wever.
Recherchenan a sigui cu e investigacion y probablemente pa falta di personal rond di tanto caso di AO debi na Covid-19, no por a detene mas prome. El a cumbinie si, pasobra entretanto el a casa, tene fiesta, bay cu luna de miel y regresa nos isla pa awo e hay’e cera den cel di ward’i polis acusa di bringamento den gang den publico.
Awe mainta e ordo di detencion tabata pa dos sospechoso. Separa di Kevin Wever, tambe e fiscal a duna ordo na polis pa detene Christopher Williams, e otro yiu di e lider politico Michael Williams. Algun siman pasa a detene su yiu Nigel Williams, cu a keda algun dia deteni den e mesun caso aki. Williams a sigura na su salida di prizon cu e no a haci nada y cu Kevin Wever ta hunga santo dilanti su mama, pero cu e ta masha fresco y boca grandi ora e ta den club nocturno. Williams a acusa cu Wever a insult’e y scupie ora el a pasa pa bay den baño, pa cual a start un intercambio di palabra y algun mokete di “planta respet”.
Abogado mr. Milaynie Kelie di e bufete di abogadonan Croes, Wever & Ruiz tin e defensa di e yiu di Prome Minister den su mannan. E mes tabatin defensa di e yerno di Prome Minister tambe algun siman pasa, ora el a bay cera pa cinco dia, den e mesun caso aki.
