Final di manera mi bos, no tin dos 2017

Djasabra último, 25 di novèmber 2017 den ouditorio di Selikor a tuma lugá kompetensia
final di debate “Manera mi BOS, no tin DOS”. Durante e semi-final tur hóben ku a finalisá e lèsnan a debatí ku otro. Seis tim a partisipá na e kompetensha final. Despues di esaki, e dos gruponan ku e miho puntuashon a pasa pa e fase final.

E proyekto Manera mi BOS, no tin DOS a ser organisá pa JCI United Citizens of Curaçao (JCI UC). JCI su meta prinsipal ta pa trese kambio positivo den komunidat pa medio di ehekutá diferente proyekto i evento
ku ta aportá na komunidat di Kòrsou den un forma positivo i duradero. Kumisando for di luna di sèptember, un kantidat di 57 hóben a partisipá na diferente tayer, manera di “Kontenido di e 17 metanan duradero di Nashonnan Uní,” “liderasgo i komunikashon pa hubentut”, “Abilidat pa debatí”, i tambe un kurso básiko di papiamentu. Asina e hóben a wòrdu ekipá ku konosementu kon pa hiba un diskurso, kon pa ekspresá su mes, formulá i defendé su opinion a base di bon argumentashon i echo. E aña aki JCI UC tabatin e oportunidat di traha un biaha mas ku Toastmasters International, Fundashon Kalidat Profeshonal Edukashonal Kòrsou (KPEK) i YouthVision 5000 pa e kurso nan aki. Un danki na nos partnernan, pero tambe na tur nos spònser i kolaboradónan ku a kere den e proyekto aki, espesialmente CWM, ICUC, St. Jozef VSBO i Biblioteka Nashonal Kòrsou. Nos ta felisitá tur hóben ku a partisipá den e semi-final i tambe final di e kompetensia di debate aki.

Prinsipalmente nos ke felisitá e grupo di hóben ku a gana e kompetensia di Manera mi BOS, no tin DOS 2017. E grupo ganadó ta konsistí di: Iyandrah Imperator, Xanthia Zimmerman, Achsa Doran, Sharithee Hironimus, Shakir Hooi i Kelly Martina. Alabes nos ta ekurashá tur hóben pa sigui traha riba nan desaroyo
personal i destaká, di forma ku Kòrsou por sigui konta riba hóbennan positivo. Boso por ta orguyoso di e perseverensia i ánimo ku boso a demostrá último durante e temporada di Manera mi BOS, no tin DOS 2017.Aki por mira e hóbennan durante di e debate i tambe e grupo ganadó risibiendo nan premionan.