E di tres edicion di e prestigioso evento Food Truck Festival organisa door di Aruba Tourism Authority lo inicia diabierna y diasabra anochi dia 26 y 27 di april di 7’or te cu 11’or. E evento aki ta tuma luga rond di Plaza Daniel Leo, Havenstraat y Caya Grandi parcialmente. Entrada ta gratis.
E aña aki, e evento tin un interes grandi cu un variacion amplio di e cumindanan cu ta bay wordo ofreci, manera crioyo, grill/BBQ, Mexicano, Americano, Mediteraneo, Hulandes y mas. Compara cu e añanan anterior, lo bay tin 18 truck adicional, cual lo resulta na un participacion total di 35 foodtruck. Entre e variacion di cuminda lo tin participacion di food stands, food trucks, opcionnan vegetariano, cigar, artesania, y un stand special cu cerbes. Lo bay tin un ‘Coffee Corner’ unda por bebe koffie y asina nos local y turistanan por cera conoci cu e custumber local di cuminda di truck.
Diasabra, e ultimo anochi di Food Truck Festival, lo tin un asina yama ‘go Dutch’ pa celebra y honra Dia di Rey, pues ta un invitacion cordial pa tambe uni bo mes na e tema aki uzando bo creatividad y bin disfrasa cu algo unico den e tema di Dia di Rey.
Durante e dos dianan, nos musiconan local tambe ta un adkisicion na e evento y lo percura pa un entretenimento varia full anochi. Sin laga nos chikitonan afo, lo tin un ‘kids corner’ pa asina deleita nan anochi mientras nan mayornan ta cana y disfruta na e diferente stand.
Diferente na e añanan anterior, e aña aki lo bende tokens solamente durante e evento. Lo tin tres booth pa asina facilita e publico cu un servicio rapido, di cual un stand lo ta solamente pa transaccionnan cu carchi ATM y e otro dos lo ta tanto placa efectivo como carchi ATM. Cada token lo tin un balor di AWG. 2,50
Den cuadro di A.T.A. su enfoke riba un desaroyo duradero, lo suministra productonan cu ta respeta e medio ambiente, manera tayo, straw, boxes, napkins y bestek traha di un material cu ta ‘milieuvriendelijk’ (‘biodegradable disposable’) na e participantenan durante e evento aki.
Tuma nota cu en conexion cu evento di ‘Eat Local Food Truck Festival’ dianan 27 y 28 di april e cayanan den cercania di Plaza Daniel Leo lo ta parcialmente cera. Aki ta trata di Schelpstraat / Emmastraat / Klipstraat y Havenstraat. Ademas, diasabra dia 27 di april Arutram lo no ta coriendo debi na e logistica di e festival.
E comunidad di Aruba y nos turistanan ta wordo spera pa asina disfruta di un experiencia culinario tipico den un dushi ambiente. Pa mas informacion por bishita ‘Eat Local’ riba Facebook.
