Filipinonan na Aruba a celebra nan Dia di Independencia

Diaranson mainta e colonia Filipino na Aruba a celebra e di 121 aniversario di nan Independencia, cual acto protocolario a tuma luga den Wilhelmina Park.

Tabata tin varios dignatario presente na e evento aki, incluyendo Gobernador di Aruba, Prome Minister, demas Ministernan y tambe Parlamentarionan cu a haci acto di presencia y asina comparti e momentonan aki di hubilo cu e Filipinonan na Aruba.

Tabata tin entre otro baile, discurso di e consul di Filipinas na Aruba, Amy Henriquez y tambe e Consul General di e Embahada di Filipinas na Hulanda, Lolita Kapko, kende a bin pa no solamente celebracion, pero a reuni cu e Cuerpo Consular na Aruba. Esaki tabata su prome bishita na Aruba.Consul General di Filipinas na Aruba, Amy Henriquez a comenta cu e tabata hopi contento cu e celebracion aki. En corto, e ta sigui conta cu nan ta masha contento cu tur cos cu nan ta haya na Aruba.

 

Filipinonan na Aruba a celebra e di 121 aña di nan independencia

Filipinonan na Aruba a celebra e di 121 aña di nan independencia. Click aki pa mas https://24ora.tv/2XPBTqJ

Posted by 24ora on Wednesday, June 12, 2019

Retiro

Amy Henriquez ta retira como Consul General, despues di 13 aña. Pero e tin un rason hopi valido. E ta mama y kier dedica su mes na su yiu cu ta bay studia na Canada, pero mirando cu e ta un menor di edad, e mester ta cun’e.
E no ta kere si cu e lo postula su mes mas como Consul General. Tin hopi sanger fresco cu idea nobo cu por tuma over e profesion aki. Ta duna posibilidad pa un otro persona tuma over. Tin cuater candidato na bista, pero ta hopi trabao, el a bisa.

Consul General

Lolita Kapko ta consul general di e embahada Filipino na Hulanda y su prome impresion ta mas di loke el a spera y el a wordo ricibi na un manera caluroso na Aruba, tanto di e Filipinonan mes na Aruba como di e Arubianonan mes.

Asistencia na e comunidad

E aña aki tambe tin un Cuerpo Consular na Aruba. Nan lo ta otorgando paspoort y otro registracion civil di e Filipinonan. Nan tin cu registra nacemento y tambe casamento di e Filipinonan na Aruba. Ta haci esaki como algo regular y anual pa e Filipinonan. Tin asina hopi Filipino na Aruba y no ta tur por haci esey na Hulanda. Kapko a comenta cu e lo ta mas cu contento di bin cu un team pa haci esaki y alabes bishita Aruba.

 

Comments

comments