Awe comunidad Filipinas ta celebra e di 123 aniversario di declaracion di nan independencia y ta contento cu tur hende a presenta na Wilhelmina Park, pa haci e evento aki uno grandioso, manera antes.
Segun Amy Henriquez-Mendez, consul honorario di Filipinas di Aruba, a splica antes nan tabata bao di e bandera di Spaña. Tempo cu nan a descubri e islanan, nan a cay bao di rey Felipe. P’esey a yama nan Filipinas. Esey tabata na aña 1521.
Henriquez a splica cu semper tur aña cu nan tin nan programa, e ta duna un premiacion. Nan no a tene nan celebracion aña pasa debi na COVID. E premiacion (award) a bira awo, na luga di 10, pa 20 hende y tur ta enfermero, como gradicimento pa nan esfuerso, sacrificio y dedicacion, pa tur hende, specialmente pa Aruba durante e pandemia.
Henriquez a conta tambe cu a invita e embahador di Hulanda bin Aruba, mirando cu e consul ta cay bao di hurisdiccion di Hulanda. Pero lamentablemente, esaki no por a presenta, debi cu e no a haya su vacuna ainda. E aña aki no tabatin autoridad mas halto pa asina presencia e celebracion.
Henriquez ta gradici presidente di parlamento, Ady Thijsen como tambe prome minister Evelyn Wever-Croes y demas minister, parlamentario, invitado y tambe cuerpo consular cu tambe a bin join e celebracion.
Por ultimo Henriquez a bisa cu semper e Filipinonan t’ey na Aruba pa yuda. Beneficio di nos pais ta cu ciudadanonan di ambos nacion (Arubiano y Filipinonan) tin cu traha hunto pa por haya un bon progreso y economia pa e pais. Semper Aruba por conta cu e Filipinonan pa por duna un man.
