Diasabra ultimo a bira e “Super Saturday”, e prome di e aña aki, considera den e fin di siman mas ocupa di henter aña. Un total di 7.700 pasahero a pasa dor di e terminal diasabra, mayoria bandonando nos isla, despues di a habri aña aki. Aunke cu e operacion a bay bon, semper e tin su retonan.

E aña aki no tabata diferente, debi na retrasonan mara na e tormentanan di sneu den area di “east coast” cu ta precisamente e rutanan mas bula pa y for di Aruba. No tabatin cancelacion, pero debi na yegada lat, ta stroba e operacion regular na aeropuerto, cu ta e causa di filanan largo pa check-in y pa e diferente puntonan di control na Inmigracion y na e “Security Checkpoint”.

Gobierno ta spera cu e aña aki lo ta un record den turismo, den cual ta spera un aumento grandi den turistanan for di e continente Americano. Esey ta bonbini na e momento aki, specialmente si tene cuenta cu e caida drastico den nos di dos mercado mas importante, esta Venezuela.

Mester menciona cu e frieu abnormal na Merca actualmente tambe ta beneficia Aruba como destinacion turistico, pasobra turistanan ta prefera core pa frieu y bin den e calor di Aruba. Mas largo e temporada di Winter, mas frieu haci, miho e ta pa Aruba.

Comments

comments