KIA ta un prison sin capitan. Despues cu e director Rocco Tjon a drenta parlamento, te awe no a nombra un director nobo. A tende hopi cos pero nada concreto. Minister ta papia varios cos cada biaha den conferencia di prensa, pero ningun ta concretiza.
Mientras cu ningun decision ta wordo tuma, presonan ta birando doño di prison KIA na Santo di Patia. Droga, cellular y arma blanco ta skeiro manera awa den lama. Falta solamente pa tin arma di candela eyden. No ta descarta esey pronto. E AO melding ta halto na KIA. Trahadornan ta demotiva. Cos no ta facil. Mientras cu cuidadornan di preso ta traha overtime sin limite, nan cansancio ta desvia e atencion 100% cu mester tin pa trabou. Presonan tin comunicacion directo cu e mundo pafo di KIA. Nan tin smartphones pa asina por keda activo riba nan facebook y Instagram. Mas cu un preso ta post cos bibo y directo for di nan cel den KIA.
Esey caba ta confirmabo cu un caminda seguridad den KIA ta fayando pa falta di capacidad. Algun dia pasa un otro preso cu a snitch, a bolbe den KIA y nan a hinke hera mata. E imagennan aki ta djis pa duna abo un impresion con dushi presonan ta den KIA. Unico cos cu nan no tin ta e libertad pa fisicamente ta pafo di e murayanan di KIA. E resto ta manera rey nan ta pagando nan castigo pa un delito cometi. Kizas un delito mas serio cu otro.
Den e caso aki mes por mira e video y fotonan di Ryson Paskel. E ta sera relaciona cu asesinato na Hot Zone. Pa algun siman of luna e tabata fugitivo. Awor sera den prison tabata tin wowo riba dje pasobra e tabata tin intencion di huy. Esaki ta e bida cu e tin den prison. Post tur cos riba rednan social. Libertad den su cel pa tin su telefon y su droga pa e huma y “Sin Miedo”.
