Fiesta di droga a caba cu overdosis den edificio bandona

Net despues di 6:00pm a bati alarma pa un hende muhe cu no tabata dunando señal di bida den e edificio di Dorothy Cybul, e edificio bandona color blauw net patras di Aqui me quedo den John G. Emanstraat. Paramediconan a logra rebiba e pashent, no un, sino dos biaha y cu urgencia a transport’e pa Hospital pa tratamento medico avansa. Su situacion ta hopi delicado.
Dos unidad di Brandweer, dos patruya di Polis y tres Ambulance a presenta na e sitio pa brinda asistencia. Tabata un reto pa drenta paden y yega na di dos piso di e edificio, unda e victima tabata benta na suela pa su cuenta y for di tino. Bombero y Polisnan a duna un man pa carga e victima y trece abou, mientras Bomberonan a kibra porta pa haya acceso na e sitio.

Fiesta di droga a caba na “overdosis” den edificio bandona. Situacion di e victima ta delicado! https://24ora.news/2YYwSAG

Posted by 24ora on Saturday, August 17, 2019

Mester bisa cu eyden ta un otro mundo! Decenas di adicto ta biba eyden, centenares di bais horta y otro artefactonan tin scondi den un berdadero dump di cosnan horta. Un adicto bibando eyden a conta nos cu tin mas o menos 25 adicto bibando eyden pero como 200 cumprado di droga ta yega diariamente, specialmente den weekend, pa cumpra droga.
Lamentablemente e edad di cumpradonan ta bahando tur dia y como tal ta topa hobennan cumprando droga y varios biaha, ora cu no tin suficiente of no tin placa mes, ta hasta bende nan curpa a cambio di droga. Eyden tin tur cos, pero e droga mas barata y miho bendi ta “crack” un mescla di cocaina y baking powder cu ta hum’e via un pipa.
“Diana yama e muhe aki. Di 11or di mainta e ta akiden ta huma pisa y sin come. El a muri pero e dokternan a scap’e. Nan a dal’e coriente y m’a mira con e mashin diripiente a cuminsa traha bek riba dje. E hendenan aki ta bin akiden, droga nan curpa bay off”, asina un adicto cu ta biba den e edificio bandona a conta nos na e sitio.
Fuentenan a confirma cu berdad e victima yama Diana, ta un local y cu e lo mester tin 36 aña di edad. Ta un señora cu yiu grandi caba pero pa un of otro motibo a bay den gara di e maldito droga! No por bisa mucho di su situacion, pero fuentenan ta sigura cu e no ta mustra bon.
Ta spera cu Dokternan na Hospital lo sa di brind’e e cuido necesario pa scapa su bida y pa despues Dios ilumin’e y pone riba e caminda di rehabilitacion, pa e por ta bek cerca su famia y yiunan cu stim’e tanto.
Ta bon pa Gobierno tuma accion cu e luga aki. Mester tin un ley pa atende cu doño di un edificio asina prominente den centro di ciudad cu ta lanta bay biba na Israel y laga e edificio desampara atras. Asina creando un problema serio den henter e area di Oranjestad. E bisiñanan a keha cu nos cu ta tur dia tin fiesta di droga den e edificio y ningun hende ta para responsabel. Ta comosifuera a “bende” e edificio aki cu baho mundo di droga, pasobra ya hopi transaccion di droga ta pasa eyden diariamente, bendiendo droga cu turista y cu nos propio hendenan local!
Tocante e droga “crack”
E droga conoci como “Crack” of “Piedra” ta un forma diferente di procesa cocaina cu enbes di hal’e via nanishi, cu esaki por hum’e via un pipa. E ta ofrece e adictonan un formula intensivo di haltura. E hecho cu e ta un droga hopi adictivo, ta haci’e popular bou di hobennan y ta expertonan ta consider’e como e droga mas adictivo di cocaina riba mercado.
E formula pa traha “crack” of “piedra” ta dor di cushina cocaina combina cu Baking Powder, haci’e duro, pa despues kibr’e pidapida den piedra.