Ocho di september ta celebra fecha natal di Mama Maria. E ocasion aki a keda marca cu un bunita ceremonia cu hopi hende a atende na Kapel di Alto Vista. Robert Jeandor kende ta un di e boluntarionan c uta percura pa mantencion y proteccion di e kapel a indica cu nan ta contento cu e cantidad di bishita ricibi pa recorda Mama Maria, Mama di Hesus su dia. El a indica cu na pais bisiña di Venezuela tambe ta celebra e fecha aki na honor di La Virgen del Valle.
Kapel di Alto Vista ta un luga masha stima y bishita pa tanto hende local, como dor di turistanan. “Mericanonan tas tima Alto Vista,” Jeandor ta indica. “E ta un luga cu hende ta haya bon experiencia. Nan ta bin paso tin algo bunita na dje.” E ta invita hendenan di Aruba pa tambe keda bin kapel.
Su mes ta yega tur día marduga, poco pasa di 5’or pa habri e portanan di e kapel pa publico. Ta wak cu tur cos ta nechi manera mester ta y kapel ta keda habri te 6’or di atardi. Jeandor ta splica cu mas ainda den e temponan aki di COVID-19, ta pone hopi atencion na hacimento di limpi.
El a gradici e grupo di boluntarionan cu, hunto cune, ta pendiente tur ora cu tur cos ta bay bon cu kapel. Esey ta inclui tambe e grupo di señora cu ta bin tur dialuna mainta pa haci limpi. “Nos tur semper ta akinan pa mantene e kapel limpi, nechi y na orda pa tur hende cu ta yega,” Jeandor a bisa.
