Studiantenan di Universidad di Aruba (UA) facultad di Hospitalidad y Turismo (FHTMS) como parti di nan curso di “Events Management” ta organisando seis projecto pa nos comunidad den luna di april.
Mision di nos facultad ta pa prepara studiantenan cu e conocimiento y abilidad pa eherce e rol di lider den nos comunidad y pa ta conciudadanonan di caracter den e industria global di hospitalidad y turismo.
E projecto di servicio comunitario ta un ehercicio cu ta permiti e seis (6) team nan di cinco (5) studiante aplica e conocimiento acumula di e teoria pa planea, organisa, y ehecuta un evento special pa recauda fondo pa un instancia den nos comunidad. E meta di e projecto “Community Service Project: Special Fundraising Event” ta pa desaroya e conocimiento y abilidadnan di e studiantenan, pero mas aun motiva y involucra nan pa duna bek na nos comunidad.
Den e auditorium di UA un grupo di 30 studiante a presenta nan idea / concepto na representantenan di Aruba Chamber of Commerce, ECO DMS y CEDE Aruba y miembronan di instancianan. Nan presentacion a inclui informacion di e instancia, motibo dikon a scohe esaki, tipo di evento, con lo mercadea e evento, recurso cu mester pa ehecuta (voluntario, cuminda, fondo, y mas). E meta tras di presentacion tawata pa nan ricibi feedback ariba nan evento y pidi sosten financiero pa por ehecuta esaki. Mester agrega cu e audiencia a keda masha impresiona cu e pasion di e studiantenan.
Segun e docente, “Cu e projecto aki kier logra pa e studiantenan pone den practica locual cu nan a siña durante e semester. Organisa un evento no ta algo facil, ta rekeri abilidadnan manera flexibilidad, creatividad, originalidad, bista pa detaye, initiativa, maneho di tempo, comunicacion, resolucion di problema y mucho mas.”
Nos facultad completo ta invita pueblo di Aruba pa bishita e diferente eventonan y sostene nos studiantenan cu ta trahando duro y di curason♡ pa nos comunidad.
April 6 di 9:00am – 1:00pm na Dyon Center Oranjestad: Collection Un P’ami un P’e (Imeldahof)
April 6 di 10:00am – 2:00pm na Fontein Kleuterschool San Nicolas: Family FunTein Day
April 6 di 4:00pm – 9:00pm na Commandeur Pieter Boer Basis School San Nicolas: Family Film Bazaar
April 13 di 7:00pm – 9:00pm ariba barco di Freewinds: Concierto di Angela Croes (Telefon pa Hubentud)
April 14 di 5:00pm – 7:00pm na Fisherman’s Huts: Walk for Paws (Aruba Animal Shelter)
April 20 di 6:00pm – 9:00pm na Club Caiquetio: Blue Bingo Event (Fundacion Respetami)Facultad di Hospitalidad y Turismo di Universidad di Aruba ta reconoce e contribucion unico y strategico di e industria di turismo pa e desaroyo di Aruba y Caribe. Pa mas informacion di nos programa por bishita nos na www.ua.aw of via facebook @UA.FHTMS
