FHMDD: E culpabel di mas grandi di violencia domestico ta Silencio

E caso di maltrato cu consecuencia fatal di Anushka Tromp ta algo cu tabata tin hopi bista riba dje.

No solamente di parti di gobierno pero tambe di parti di fundacionnan cu ta duna sosten na victimanan y nan famia, cu ta pasando den un periodo devastador, manera cu ta e caso di e dama aki, kende no a haya e oportunidad di defende su mes contra su agresor, cu tabata tin como consecuencia, cu el a laga e mundo terenal.

FPHDD: Haci keho ora di maltrato domestico ta salba bida

Posted by 24ora on Monday, August 6, 2018

Fundacion pa hende Muhe den Dificultad a tene un conferencia di prensa, caminda na apertura di e reunion, a expresa nan profundo condolencia na famianan di sra. Anuskha Tromp. Segun Suzette Kock, presidente di e fundacion, ta momentonan hopi dificil pa nan, pa varios motibo. Nan ta bin ta papiando di e situacionnan di violencia domestico, con grave ta pensa cu e situacion ta, cual e ta mas grandi di loke ta pensa cu e ta.

Na December caba, e fundacion a haya su mes, moralmente obliga pa para pa evento di recaudacion di fondo, na momento cu a perde 2 criatura, na e mesun un man bao di violencia domestico y awor aki ta haya cu un dama ta bira e victima di violencia domestico.

E caso
Loke por bisa di e caso ta, pa con duro cu e lo zona, e no ta un sorpresa pa fundacion pa Hende Muhe den Dificultad, cu un otro victima ta cay. Apesar di tur locual cu Fundacion ta haci pa hib e noticia ey fo, duna informacion vooral riba nan pagina di Facebook, unda cu el a bira un medio caminda cu e informacion aki ta wordo pasa.
Medionan di prensa tambe cu a duna echt asina hopi interes na tur caso di violencia domestico. Prensa ta mustra riba dje, ta atende cun’e. Apesar di tur esey, awe nan ta sinta un biaha mas dilanti di un otro caso.
Loke tin di compronde cu nunca e señora aki a acerca e fundacion. Te na unda cu nan in e informacion, nan no a wordo acerca tampoco.
Esey por cambia mientras cu e investigacion ta sigui den e caso aki. Pero cerca e fundacion e dama aki no a yega pa ayudo. Por a lesa algun comentario unda cu ta bisa unda Fundacion pa Hende Muhe den Dificultad a keda.
E fundacion ta situa na unda e ta semper, cual ta Primavera 1B. E fundacion no ta obliga ningun hende pa bin cerca nan. E persona mes mester bin na un manera voluntario. E fundacion ta keda pone e fundacion eyfo cu un golpi ya caba ta dimas. Un insulto ya caba ta dimas. Hasta esey ta parti di violencia.
No ta solamente golpi. Ora cu yega na golpi, hopi cos a pasa caba den un relacion. E ta hopi dificil pa e fundacion pasobra cu pa un of otro motibo e dama aki, sea no tabata sa di e informacion of no a haya cu e informacion a motiv’e pa yega cerca e fundacion. Mas esaki ta bay pusha e fundacion pa nan keda y intensiva e manera cu nan ta trece e informacion eyfo.
Pa tur dama of esnan cu ta wordo confronta cu violencia den famia, por fabor no keda keto. E culpabel di mas grandi ta silencio. Ora cu ta bisa un posibel victima, cu t’abo mes ta gusta, of ta pone stigma riba dje, ta dun’e miedo pa busca ayudo. Al contrario, tin cu yuda nan kibra e silencio.
Si sa di un caso, yama polis, nan ta e prome yama pa atende cu casonan asina. No ward te ora cu cosnan mester yega asina leu, cu tin cu bolbe perde un ser humano na man di violencia domestico. Ban yuda kibra e silencio. Silencio ta mortal. El a wordo mustra na December y e ta wordo mustra un biaha mas, awor aki.

Magali Maduro, coordinador pa Fundacion pa Hende Muhe den Dificultad, ta comenta cu nan ta lamenta profundamente cu awe mainta tempran a wordo lanta pa un noticia asina tristo cu a conmove hopi hende aki na Aruba. A conmove hopi hogar y ta conmoviendo nos islanan di Caribe. A haya hopi reaccion pa e caso particular aki y hopi hende ta lamenta cu el a sosode. E pregunta cu ta surgi na e momento aki ta, cuanto mas. Cuanto mas victima nos mester pa nos por realisa cu nos sociedad ta bayendo den un caminda negativo. Si nos, no, conhuntamente dicidi pa haci algo na esaki, sino conhuntamente bisa cu nos no ta acepta ni tolera den nos sociedad, e tipo di abusonan aki, e ora nos por bien lubida. Mas y mas e violencia ta manifesta su mes den nos sociedad. E ta di lamenta masha hopi mes cu awe mainta, dos yiu ta realisa cu nan mama no tey mas.
Tambe e hende muhenan cu awe ta realisando cu si e no sali for di e situacion aki, kisas e tambe ta un victima, kisas cu e tambe por caba como un estadistica mas.
Awe mainta a wordo yama mesora pa minister di asuntonan social, Glenbert Croes. Mesora el a mustra cu e kier atencion pa e caso aki. Hunto cu e resto di Aruba, bay traha un tiki mas duro cu ya ta haciendo caba. E fundacion ta purba di ta den media constantemente, concientisa nos hendenan muhe. Esaki ta un tema cu no mester sconde mas, ta un tema cu tin cu papia rond di dje. Hopi hende a yama y tambe doñonan di trabao. Tin concientisacion ta tumando luga, pero segun Maduro, e no sa si ta suficiente.