FHMD: Ta yudando mas y mas den casonan di violencia domestico

Fundacion pa Hende Muhe den Dificultad, ta celebrando e aña aki 24 aña di existencia. Segun Magali Maduro, coordinador di e fundacion, nan a start na 1995 y ta yudando mas y mas hende, tanto hende muhe como hende homber na Aruba y tambe e muchanan cu ta envolvi den casonan di violencia domestico, e asina yama victimanan silencioso.

Situacionnan

Na momento cu e persona a experencia un forma di violencia, loke ta yama Red Flags. Na momento cu e discusion a bira mas agresivo verbal of a dal mokete den muraya, mokete riba mesa. Ora cu e prome biaha cu a pusha. Eynan tin cu bati alarma caba. E no ta bon, pasobra normalmente no ta papia asina cu un persona cu bo ta den relacion cun’e. E momento ey caba, señalnan mester sali cu tin cu busca den un manera of otro pa sali for di e relacion of tackle e issuesnan cu tin.

FHMD: Ta yudando mas y mas den casonan di violencia domestico

FHMD: Ta yudando mas y mas den casonan di violencia domestico. Click link pa mas https://24ora.news/34jiZM1

Posted by 24ora on Monday, November 25, 2019

Banderanan cora

Tin hopi situacion cu red flags. Un señal basta grandi ta cu privacidad no ta wordo respeta. Manera por ehempel ta pidi paswoord pa telefon, paswoord pa drenta social media. Un control. Na momento cu tin un control ta eherce riba bo, cu bo ta sinti cu e no ta ok, e no ta ok. Nos curpa ta e miho termostaat cu nos tin. Bo curpa mes ta bisami cu e cos aki no ta bon. Bo curason ta bati y ta bisabo cu e cos no ta bon. Ta señalnan e ta dunabo pa bo bula afo. Sali for di e situacion y busca ayudo.

Ayudo

E fundacion tin dos pilar, esta e parti ambulatorio y e parti residencial. E parti ambulatorio ta pa loop in, haci afspraak y papia cu e trahado social. Na e momento aki nan tin dos trahado social y un psicologo den servicio cu por yuda tur hende cu ta biba na Aruba. Esey por bin papia, busca informacion, busca yudansa.
Tin e parti residencial cu na e momento ey ta un crisis, cu un persona no por keda biba unda e ta biba of keda den e situacion ey cu e fundacion por duna un dak riba nan cabes, mientras tanto cu nan ta resolve e problema.

Cuanto hende

E fundacion tin cinco apartamento na e momentonan aki. Por yuda cinco famia. E mama y su yiunan. Tin un apartamento cu por tuma un mama cu cinco yiu, esta seis persona. Esey ta esun di mas grandi. Pero ta bay expande y e ta necesario. A base di e cantidad di cliente cu ta acerca nan, nan mester expande. Tin plannan hopi avansa caba pa loke ta construccion di 14 unidad mas, pasobra ta asina tanto tin mester. E aña aki a yuda ambulantemente 220 persona, cu a bin te cu november. A duna refugio na 31 dama y en total nan tabata tin 57 yiu. Si cont’e hunto, e ta un grupo basta grandi cu e fundacion a yuda e aña aki. Tin e cifranan di e psicologo cu en total a yuda 50 hende, mirando cu ta yuda tanto hende muhe, como hende homber y muchanan.

Trabao conhunto

Maduro, kende ta coordinadora di e fundacion, a splica cu una bes cu un cliente bin cerca nan, ta traha un plan di ayudo cun’e. Kico tin mester, kico kier pa yuda cun’e. No ta tur hende tin e mesun necesidad. No ta tur hende kier pa bo yudanan di e mesun manera. Cada hende ta individuo y ta unico. E ora ta sinta, e trahado social ta sinta papia pa mira kico unda mester ayudo den ki area den bo bida. Mester busca trabao, of vivienda. Otronan mester ayudo psicologico. Otronan ta scol pa nan yiunan. Tin diferente area di bida cu e fundacion por yuda. Nan ta priorisa kico pa nan ta importante na e momento ey. E fundacion ta duna un maximo di 3 luna y tin biaha ta haci excepcion pa keda un tiki mas cu tres luna, mirando cu nan no tabata tin moda pa bay biba independientemente. E fundacion ta duna tur oportunidad pa e victimanan bay p’adilanti den un maximo di tres luna, pero no por duna mas. E capacidad ta poco na e momentonan aki. Si bay yuda uno cu seis luna, e ora ta perhudica otro di wordo yuda.

Mensahe

Nos ta den 2019. No tin necesidad mas pa keda den un relacion abusivo. Tin ayudo. Aruba tin profesional. Mester kibra e silencio, mester papia, busca ayudo y sali for di e situacion ey. No ta bisa pa sali for di e relacion cu e pareha, pero si drecha loke ta bayendo robes y mester acepta tambe cu e relacion no ta bay mas. Pakico. Vooral ora cu tin mucha envolvi den relacionnan asina, nan ta victimanan hopi grandi cu nos no ta tene cuenta cun’e. Algun dia pasa a celebra e derechonan di mucha y e derechonan di mucha ta, pa nan por biba den paz y harmonia y nan tin un desaroyo positivo.
Si abo como mayor ta dicidi pa keda den e situacion ey, sea cu bo ta homber of bo ta muhe, y bo tin yiu, bo ta haciendo algo contra nan derecho. Esey no por acepta. Tin ayudo, tin profesional, bel e fundacion na 5835400 of pasa libremente na Primavera 1B y bo lo haya ayudo. Kisas e fundacion no por yuda nan so, pero tin otro fundacionnan cu tambe por yudabo, unda cu por ponebo den contacto cu e trahadonan di e fundacionnan ey pa bo busca ayudo.

Nos ta drentando 2020, violencia domestico, no ta OK.