Organisacion Cabayista Arubano tabata tin un fin di siman activo. Nan tabata tin nan prome feria di aña yama Feria Betico Croes, cual a bay hopi bon. Segun presidente di e organisacion, Myron Wever, e muchanan cu ta bayendo seleccion a bende full nan cushina. E bar a bende bon y e ambiente tabata ameno.
Wever ta sigui splica cu e feria tabata uno local, sinembargo e hobennan ta preparando pa un mundial cu lo tuma luga na Cali, Colombia den diferente categoria. E ta cuminsa di 4 aña te cu 24 aña.
Myron Wever ta gradici Divi Resorts, mayornan, e muchanan mes, full e team di directiva di OCA y tambe tur e fanaticonan, famianan cu a bin apoya durante e fin di siman cu a pasa.
Aruba tin un solo organisacion di Cabayista cu ta OCA, y ta organisa ferianan oficial cu ta conta pa puntuahenan cu ta bay pa un mundial.
OCA tin un calendario pa full e aña. Nan siguiente feria ta na maart durante Himno y Bandera. Ta pidi pueblo en general pa bin apoya e ferianan, bin apoya e muchanan. Tur feria ta pa recauda fondo pa asina por hiba e muchanan na e mundial na Cali, Colombia.
OCA ya caba tin su calendario pa e aña aki. Apoya e jinete y amazonanan cu sigur lo bay haci un bon papel na Cali, Colombia.
