Contrario na e orario di custumber cu ta parti mainta, e federacion di esgrima, SABA lo organisa un competencia di esgrima riba e diabierna 27 di april proximo riba Dia di Rey cuminsando pa 6or di atardi.
Esaki lo ta e di tres competencia di e aña aki organisa pa dicho federacion mirando e dos competencianan anterior cu ta Dia di Betico y Himno y Bandera. E competencia lo wordo teni na IBISA San Nicolas y ta pa tur atleta y clubnan miembro mientras e programa lo inicia pa 6or di atardi. Ta pidi encarecidamente na e clubnan pa inscirbi tempran y e atletanan tur mester bini uniforma. Mester bisa cu e competencia ta riba wapen y degen.
E deporte di esgrima conoci tambe como un deporte Olimpico ta creciendo poco poco na Aruba mirando e scolnan cu tini. Aña pasa e federacion a conoce un bon temporada unda a logra varios premio den e Dutch Caribbean Fencing Championship. E federacion di esgrima a organisa tambe un workshop duna pa e experto mr. Sarkis Assadorian. E workshop aki tabata un exito rotundo unda e experto mr. Assadorian durante 6 dia largo a duna diferente tayer unda a enfoca riba e agilidad, reflex, resistencia, habilidadnan basico, drills y mas cu claro con pa anda cu e materiaal di esgrima. Siman pasa, e atleta prospecto den e deporte di esgrima, Tirslain Jansen tabata nomina pa e categoria Atleta di Anja 2017 den Premio Excelencia den Deporte.
Stichting Sportsubsidie Aruba ta subsidia e campeonato di esgrima en connexion cu Dia di Rey.
Cumprando weganan di Lotto, e Loteria di Aruba manera Catochi, 1-Off, Big 4, Zodiac, Wega di Number Korsou, Lotto di Dia, Lotto 5, Mini Mega cu su Mega Plus y e diferente weganan di Raspa Y Gana bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.
