A entrega premio na e ganadonan di campeonato Hubenil di Dammen

Diadomingo atardi a tuma luga entregamento di premio na ganadonan di Campeonato Hubenil di dammen pa aña 2018. E deporte di dam y ahedres ta resorta bou di un solo federacion. E torneo di dammen a wordo hunga den 2 categoria esta U-12 y U-18 unda cu despues di un bon bataya e ganadonan di 2018 a bira conoci.

Den categoría U-12, e hoben Neider Silva a bira e campeon absoluto. E hoben Neider a score 10 punto, perdiendo 1 solo wega mientras na di 2  y 3 luga tabatin un empate entre Jose Miguel Bueno y Devin Davelaar, ambos a score 5 punto. Despues di weganan extra, Jose Miguel Bueno a keda na di dos luga y Devin Davelaar na di tres luga.

Den categoría U-18 a bira campeón e hoben Alan P Suarez cu a gana tur su weganan.

E di dos luga a bay pa su ruman Angel R. Suarez. E hoben aki a perde 1 wega, tabla 1, y a gana 3 wega, na di tres lugaba keda Patrick Williams. Patrick a score 6 punto ( 1 perdi, 2 tabla y 2 gana). 

E directiva di dicho federacion a haci entrega di e premionan na e respectivo ganadonan. Den 2019 ta spera mas participacion den e deporte di dammen sigur cerca nos hobennan unda cu lo cuminsa promove e deporte den nos scolnan basico y avansa na Aruba. 

Stichting Sportsubsidie Aruba ta contento di por aporta y brinda e ayudo necesario na e federacion di ahedres/dam pa cu nan campeonato 2018. Stichting Sportsubsidie Aruba a yuda subsidia e campeonato di dammen 2018.