FCCA tin proyectonan ta andando varios caminda. Nan tin na Tanki Leendert, tambe na Isaac Wagemakerstraat, na Weg Sero Preto. Pero tambe tin proyectonan andando na Kiviti, como tambe nan ta bezig cu e infrastuctura na Weg Kustbatterij.

Pa oke ta e proyecto cu tin andando na Shaba, pero ta proyecto cu nan a bende tereno na diferente cumprado y nan ta construyendo nan cas, segun Edwin Tromp di FCCA. Mayoria parti ta cu financiamento di FCCA, pero por tin algun cu a haya financiamento otro caminda.

Interes

Tromp ta sigui splica cu asina cu hende kier cumpra of traha cas, na momento cu FCCA tin verkavelingsplan cla, nan ta bini pa registra nan mes. Ta pasa den un proceso di financiamento  y unabes cu e persona ta busca su bouwvergunning y hay’e, e ta bay notario. Unabes cu e acto pasa, e construccion ta cuminsa.

FCCA tin varios proyecto di cas den pipeline

FCCA tin varios proyecto di cas den pipeline

Posted by 24ora on Monday, September 16, 2019

Na Kiviti, Isaac Wagemakerstraat y Tanki Leendert, tin proyectonan di cas pero pa huur. Esaki ta debi cu tin un demanda grandi pa casnan di huur, segun Tromp.

Pa e aña aki tin proyectonan den construccion y a hasta firma e contract caba pa 200 of algo mas di casnan. Pa otro aña tin e mesun pensamento pa construi otro 200 cas mas.

Casnan na Kiviti

Na Kiviti tin varios cas traha caba, rond di 60 cas y awo ta trahando 71 cas mas. Pa e proyecto aki, ta trahando cu un compania di construccion. “Ta bon pa agrega pa comunidad sa cu FCCA ta papia cu varios contratista y hopi di nan, primeramente no tabata kier a bay den construccion di pre-fab pa un of otro motibo. Tambe logico, ora tin e proyectonan aki, ta diferente ta participa y esun mas bentahoso ta haya e trabao.”

Tromp a añadi cu nan ta bezig atrobe cu un contratista pa cu producto Colombiano. Asina tende di dje pa wak con leu e ta y ki prijs e tin, FCCA ta wak si e ta loke nan ta premira. Asina ey por traha e tipo di casnan ey tambe.

Tambe a papia tambe cu tin otro contratista cu ta dispuesto y ta considerando seriamente pa traha casnan tipo di pre-fab cu a yega di traha caba. Asina ey ta haya mas opcion y mas posibilidad pa traha mas vivienda pa cumpli cu e demanda. Asina cu un edificio keda cla, ta cuminsa cu construccion di e siguiente edificio. Manera na Tanki Leendert, tin uno practicamente cla y awo a cuminsa cu e otro. Aki ta bin tres pa yega en total 36 cas.

Na Kiviti tin un compania local envolvi pero e productonan naturalmente ta bini di afo. Ta dificil pa haya tur loke cu mester na Aruba mes. Di otro banda, no mester descarta cu kisas mester traha trahadonan di afo. Tur cos ta depende cuanto trahado lo haya localmente. Y naturalmente mester regla e permiso mescos cu cualkier otro compania. E casnan na Kiviti no ta e mesun casnan cu tin caba. Tin cas pre-fab na Aruba caba y no ta producto nobo, segun Tromp.

Tambe a haya algun compania di afo cu ta interesa, cu ta Italiano/Venezolano, pero no a bin mas. A haya un otro grupo cu kier a trece un sistema di Turkia. Pero esey tabata fuera di alcance pa loke ta e prijs.

Tin un persona cu tin un contratista na Aruba cu a bin cu producto pa FCCA, pero e prijsnan no ta loke por cumpli cun’e. Awor aki e contratistanan cu tin, tur ta compania local. Cu nan tin empleado di afo, por bien ta, segun Tromp.

E prijs

E ta un desafio pa haya contratistanan local cu prijsnan no mucho halto. Apesar di nan prijs, ta sinta na mesa cu nan y ta mustra kico ta e presupuesto di FCCA. E decision ta keda na nan, si nan kier haci’e. Tin contratista cu ta bisa por ehempel, cu bao di 2600 florin pa vierkante meter nan no ta traha. Pero e prijs aki ta algo cu FCCA no tin presupuesta y ta purba haya companianan cu por brinda prijsnan di entre 1500 y 1600 florin pa meter cuadra.

 

Comments

comments