FCCA tambe ta sigui diferente comentario den prensa y tambe social media y ta berdad cu nan tabata maneha diferente cas di gobierno y tambe cas di FCCA mes.
Esaki ta prome cu 2016. Esaki ta referente un caso cu a sali recientemente di un ciudadano cu ainda ta wardando papel pa notario. Segun Edwin Tromp, kende ta director di e parti comercial y proyectonan tecnico di e instancia, e persona cu a cumpra cas, FCCA tabata e entidad intermediario, pero te ainda documentonan legal, caminda cu ta haya e erfpacht riba nomber di e ciudadano, no a sali. Ta compronde cu e ta tarda hopi.
Loke cu Tromp kier a trece dilanti tambe, cu tin cas cu a maneha durante un periodo cortico y poco despues a cuminsa bendenan pa gobierno. Gobierno ta esun cu tabata aproba y instrui pa bende. FCCA tabata intermedia y papia cu e departamento concerni e tempo ey, DIP y asina tabata saca e documentonan na nomber di e cliente, bay notario y traspasa e cas pa e doño nobo.
Despues di esey a haci e tramite full y despues toch busca e documentonan. Esey berdad a pone cu e documento ta tarda. Hende a paga caba pero ta depende di otro instancia di gobierno. Esey no ta nifica cu nan ta perde nan derechonan. Es mas, e personanan en cuestion ta bibando den e cas tambe. No ta algo cu nan no ta biba den e cas y kisas otro hende tin beneficio di esey.
Na 2016 pa fin di aña, gobierno y FCCA a yega na un entendimento, loke ta vaststelling, caminda tur cas di gobierno, cu tabata 512 e tempo ey, a pasa y lo pasa pa FCCA. E tabata un acuerdo pa elimina loke gobierno debe FCCA of loke FCCA tin pa gobierno.
Pero lastimamente e documentonan no a keda cla y e traspasonan no a tuma luga ainda. Tin cu bisa cu FCCA tambe ta tras di esaki. Ta spera cu prome cu fin di aña por haya e documentonan. Asina cu haya nan, tin casnan cu a wordo cumpra y cu tin un acuerdo cu e doñonan, lo haci tur lo posibel pa conclui. Asina e casnan ta riba nomber di FCCA, lo pasa esakinan pa e doñonan nobo.
Pa un par di proyecto cu FCCA a traha, cu a haya tereno di gobierno – manera na Bushiri, Cura Cabay Zuid, y Mabon – eseynan tambe ta trahando cu Gobierno pa keda cla cu e documentonan legal. Asina cu e pasa riba nomber di FCCA, nan tambe lo haci lo posibel, hunto cu notarionan, pa pasa nan riba nomber di e doñonan nobo.
