Fundacion Arubano di esnan Visualmente Incapacita (FAVI) ta organisando e actividad di “Walk with a vision 2019” y esaki ta di 8 aña cu ta haciendo esaki.
Ta organisa e actividad aki pa recauda fondo. Cu solamente 5 florin bo ta aportando y contribuyendo na tur servicio cu FAVI ta duna gratituamente na personanan cu limitacion di bista of cu ta ciego.
Tambe bo ta participando pa bo mesun salud cu e caminata di FAVI “Walk with a vision” cu e oportunidad di gana diferente premio y pasa un rato familiar cuminsando for di Fishermen hut bay te cu Arashi bin bek.
E caminata lo ta dia 31 di maart y registracion ta cuminsa 4:00pm, segun Charlène Marchena, giua di actividad di FAVI. Pa 5:00pm lo tin zumba duna pa Rose-Ann Ruiz di Aruba Zumba y despues lo continua cu e caminata pa henter pueblo di Aruba. Por haya ticket na FAVI na Primavera 233 y tambe por yama na 582-5222 of 582-5051 pa reserva ticket.
E aña aki FAVI lo ta haciendo premiacion na e grupo mas anima durante henter e caminata y e grupo aki lo bay cu e copa di “Grupo mas anima”. Asina ta celebrando e45 aña di existencia di Fundacion Arubano di esnan Visualmente Incapacita.
Segun Rosa Kelly, kende ta den e comision di caminata pa 8 aña, e clientenan di FAVI tambe lo bay cana y lo tin guia di padvinderij. Ta pidi pueblo di Aruba pa bi apoya e clientenan di FAVI, pasobra esaki ta pa un bon causa. E aña aki tin pensa di pidi diferente scol pa participa y uniforma. Esaki ta pa mira cua di nan ta cana cu mas animo. Lo tin un copa pa nan tambe. Tambe lo bende ticket dia 31 di maart na Fishermen hut. Ta invita un y tur pa bin cana cu e clientenan y haci esaki grandi.
E prome 100 hendenan lo haya un T-shirt di “Walk with a vision 2019”. FAVI ta gradici tur su boluntarionan, Eric Gomes, Derrik Dijkhoff, comision di caminata. Tambe danki na tur patrocinado manera Compra, Andina Ice, Superfood, Virgilio, MetaCorp pa tur cooperacion.
