FAVI, Fundacion Arubano di esnan Visualmente Incapacita, awe mainta a tene un actividad pa su miembronan. Un evento cu a trece hopi ambiente.
Charlene Marchena, guia di evento di FAVI, a splica cu a celebra carnaval hunto cu e clientenan di FAVI. Esaki ta di dos aña cu a cambia e sistema di eligi Rey y Reina pa saca personahe carnavalesco unda tur esnan envolvi cu FAVI tin chens di participa y gana. Nan por duna un speech, haci joke of un show, compaña cu musica carnavalesco.
Mescos cu aña pasa, tabatin 11 participante cu a participa den e evento cu a bira un realidad danki na ayudo di boluntarionan. A traha riba diferente disfraz pa e participantenan por duna un show completo.
Tabatin e cantante Freddy y Tattoo, kendenan a coopera pa entretene tur e clientenan di FAVI, kendenan a gosa un mundo e mainta aki.
A gradici e artistanan cu a coopera, e team di FAVI, boluntarionan y e team di Universidad di Aruba, sin lubida e famia di e clientenan cu a coopera tambe pa e evento resulta den un exito.
