Fasilidat pa piskadónan ku ta den situashon deplorabel

Frakshon di Movementu Futuro Kòrsou (MFK) ke hasi uso di su derecho konforme artíkulo 64 di nos Reglamentu di Ordu (RvO) i ta aserka bo persona pa yama un reunion públiko ku e punto di agènda ariba menshoná.

Frakshon di MFK a wòrdu aserka dor di diferente piskadó ku ta manifestá nan malkontentu pa e echo ku gobiernu di Kòrsou apesar di a primintí nan shelu i tera no ta kumpli ku e promesanan aki relashoná ku mantenshon di fasilidatnan.E reklamo prinsipal di e piskadónan ta ku fasilidatnan ku nan mester hasi uso di dje no ta wòrdu mantené pa gobiernu di Kòrsou. Tin diferente pir kaminda piskadónan mester mara nan botonan ku ta den un estado hopi deplorabel. Piskadónan di playa piskadó na Westpunt ya tin hopi aña ta warda pa drecha e pir na e playa aki pa nan por hasi uso di dje.

Un otro reklamo ku tin ku no ta relashoná direktamente ku e fasilidatnan, pero tambe ta un preokupashon di e piskadónan, ta e situashon ku tin na Chinchó. Aki militarnan ta hasi uso di e area aki pa nan entrená i esaki tin komo konsekuensia ku piskadónan ku ta ehersé nan fishi na e sitio aki ta sinti ku nan bida ta na peliger i ku apesar di hopi reklamo den pasado nada no ta wòrdu hasi pa remediá e situashon aki.

Nos sa ku Kòrsou ta pasando den momentunan difísil tantu finansiero komo ekonómiko i esaki juist mester ta motibu ku gobiernu mester sostené nos piskadónan pa e aktividat ekonómiko aki tambe no bai pèrdí òf wòrdu afektá negativamente, debí ku piskamentu ta un medio di entrada pa hopi tata di famia por mantené nan famia.

Ta p’esei frakshon di MFK pa medio di esaki ta pidi Presidente di Parlamento invitá Minister di GMN señora Suzanne Camelia-Römer pa ta presente pa asina Parlamento por debatí riba e problema aki i fiha un posishon pa salbaguardiá e pilar ekonómiko aki.

Comments

comments