FaseDesk tin mas di 8000 peticion di esnan cu a perde entrada

1542

Den e conferencia di prensa di Gobierno awe merdia a papia di e cantidad di peticionnan cu a drenta na FaseDesk pa ayudo di personanan cu a perde trabou.

Gobierno ta trahando hunto cu e director di DAO, trekker di e Fase Sabine de Groot riba e Fondo di Asistencia Social di Emergencia (FASE). Gobierno a dicidi urgiendo e sector priva pa purba tene hendenan mas cu por na trabou. Minister di Labor y Asuntonan Social, Glenbert Croes a instrui pa no honra ningun permiso di kita trahado. E gobierno a realisa cu tin compania no por y tin esnan cu no kier. Pa esnan cu no por tene hendenan na trabou, no por laga mama y tata di famia sin co’i come.

E gobierno di Aruba tin e responsabilidad, e compromiso humano cu henter comunidad. P’esey a bin cu e Fondo di Asistencia Social di Emergencia unda a defini e criterianan pa cumpli cun’e. E FaseDesk ta hayando hopi peticion. E cantidad di peticion cu FaseDesk tin ta alrededor di 8400, pero tin mas o menos di 1100 peticion di dunadonan di trabou. Nan mester cumpli cu e rekisitonan, pasobra e placa ey ta placa di pueblo. E mandatario kier pa esaki bay na esnan cu realmente mester di dje, esnan cu a perde trabou pa coronavirus.

Conferencia di Prensa ultimo desaroyonan Coronavirus 7 April 2020

Conferencia di Prensa cu Minister Glenbert Croes riba ultimo desaroyonan di FASE y Coronavirus 7 April 2020

Posted by Gabinete Wever-Croes on Tuesday, April 7, 2020

Departamento di Asuntonan Social ta trahando completamente den e cuadro di Fase pero tambe como miembro di FASE task force y di bijstand p’e hendenan cu tin par di luna cu a perde trabou. E hendenan aki no ta bin na remarca pa FASE pero pa bijstand, segun e mandatario. Ta purbando di traha den un forma hopi mas accelera, mas ainda cu e crisis aki.

Tabatin bijstandnan blokia y a unblocknan, y tur esaki ta pasobra nan kier pa hendenan tin placa pa nan por come y sobrevivi, famianan den necesidad por haya paketenan di cuminda. Si e demanda bira mas hopi cu gobierno por maneha logisticamente, tin henter e fundacion di boluntario entre Fundacion Pa Nos Comunidad y CEDE Aruba coordinando pa loke ta trata distribucion di paketenan di cuminda. E mandatario a indica cu si esaki bira mas di loke por handle lo bay over na bon di cuminda.

E Fase di Asistencia Social di Emergencia combina cu e pakete di cuminda, combina cu e gracia di banconan, e flexibilidad di WEB, ELMAR. Ta pidi pa nan yega na un areglo nobo cu WEB y Elmar pa recibonan di awa y coriente. Tin hende ta bisa cu e 950 florin no ta yega, pero e coronavirus ta test tur hende.