E tabata planea pa presenta den Aruba Summer Music Festival na final di luna di juni ultimo, pero na ultimo momento no a bula mas pa Aruba. E tempo ey e mes a anuncia riba internet cu tabata su culpa y cu e lo regresa na augustus pa “make it good” cu su fanaticonan di Aruba. Organisadonan a permiti tur cu tabatin un ticket di entrada pa e festival, pa cambi’e pa e presentacion di farruko awe diasabra anochi den e mesun luga. Tin hopi expectativa pa e cantante hoben aki.
Carlos Efrén Reyes Rosado, naci dia 2 di mei 1991, pues di apenas 28 aña di edad, a yega Aruba awe merdia riba un vuelo for di Miami. E cantante y compositor di Puerto Rico, cu nomber artistico “Farruko”, a crece den su carera cantando cu Daddy Yankee, Yory y J. Alvarez. El a ranca sali su so na aña 2010 cu e album titula El Talento Del Bloque.
Farruko a start su carera musical na aña 2009. E mes ta gradici e plataforma digital riba internet “My Space” cu a yud’e crea un base di fanaticonan cu a resulta na final cu el a bira un cantante asina popular. E ta aparece den un cancion cu José Feliciano yama Su hija me gusta. Su estilo di musica sin duda ta dedica na e hobennan y ta enfoca riba relacionnan amoroso, specialmente den e genero di Reggaeton.
Na aña 012 a nomina Farruko den Latin Grammy Award pa “Best Urban Music Album”. Na aña 2014 el a lansa e cancionnan “Passion Whine” y “6 AM”, ambos canta cu J Balvin, cu mesora a crece bira e cancionnan mas scucha den zomer. Farruko tabata e cantante principal of cantante invita den varios conciertonan e ultimo añanan aki cu cantantenan conoci manera Bad Bunny, J Balvin, Nicki Minaj, Travis Scott y Wisin & Yandel.
Mescos cu otro cantantenan, e no ta bon mucha tampoco. Dia 3 di april 2018 a aresta Farruko na Puerto Rico despues di a purba sconde 52 mil dollar cash den sapato, ora e tabata regresando di un biahe pa Republica Dominicana. Desde aña 2017, ta estima cu e tin un balor di no menos cu 3 miyon dollar Mericano.
