Tica Basha Abou tabata e siman aki na Departamento di Cultura Aruba (DCA), bou auspicio di Ministerio di Cultura caminda el a haci entrega di su poster di su Show ‘Ken ta Basha Abou’ na drs. Siegfried Dumfries, director di DCA, hunto cu sr. Stanley Dabian, PR y comunicacion na DCA.

Ken ta Faritah?

Faritah, esey ta su nomber di cariño, e la ser batisa cu e nombernan di Fara Cecilia Polaris Luidens. Tres nomber ta normal biniendo for di un famia latino. Faritah ta bin di un famia grandi.

Su Mayornan tabata Juan Fernando Luidens, naci na Aruba y Carolina Helena Gomez naci na Colombia. Nan ta 7 ruman, un mucha homber y 6 mucha muhe. Faritah a haya e nomber di su wela, ya cu e la nace na Colombia.

Hopi hende ta conoce Faritah como actriz, tambe como e famoso humorista ‘TICA BASHA BAO’. Pero en realidad Faritah a cuminsa cu canto, cantantando na diferente caminda y ocasion.Semper e tabata gusta canta y for di chikito e tabata participa den cualkier evento cu por presenta.Faritah a cuminsa canta riba escenario cu 17aña, esaki a cuminsa na Colombia. Ayanan e por graba un disco 45 rpm di dos cancion cu su wela a skirbi y aregla. Na Colombia nan a gusta e stem di Faritah masha hopi mes.

Faritah tabata cantante di e grupo ‘The Young Adventures’ y tambe di e grupo ‘The Flower Power’.Faritah a bira e bos di oro na aña 1972 y despues di 3 aña a logra bay tambe cu esun di Bos Supremo di Aruba..Asina Faritah a cuminsa cosecha fama y a ser pidi pa canta y presenta na diferente show entre otro na e famoso shownan ‘Cocktail Musical’ di Ronny Marrugg y ‘Show Time’ di Tico Kuiperi na Telearuba. E la presenta den varios show na television, boso ta corda algun di nan? Pero Faritah su talento no a keda cu cantamento so, p’esey e la dicidi di drenta den e grupo di Mascaruba na unda e la presenta como protagonista den e musical Wardirikiri.

Asina e la sigui actua den varios obra como miembro di Mascaruba, Entre otro, ‘Macuarima’, ‘No mata bo curpa ta primavera’, ‘Rosas di Alhambra’, ‘E Burachenan’, ‘Sra Maloy’, y hopi mas. El a participa den diferente festivalnan di teatro na Aruba y tambe internacional. Pero como cu Faritah ta un persona cu no ta para keto e la dicidi di habri su halanan y a bay hulanda, ayanan e la cosecha hopi exito como cantante di e banda ‘Grupo Cache’. Faritah a canta cu ‘grupo Cache’ pa 5 aña largo. El a presenta tambe den un Show cu e cantante Anita Meyer di Hulanda.

Awor e ta cumpliendo 50 aña den farandula, y 22 aña presentando como humorista ‘Tica Basha Abao’. Y pa henter e pueblo di Aruba Faritah lo trece un Show yen di humor, drama, canto y hopi mas. Dianan di show lo ta e premier 22 di september venidero pa 6 or di atardi y riba 3 – 4 – 5 di october pa 8 or di anochi na Cas di Cultura! Sigur ta algo cu bo no por perde di un persona hopi stima den nos comunidad.Carchi ta na benta caba na Checkpoint Color y na miembronan di e elenco. Por yama Faritah sin problema pa reseva esun di bo na 5663711
Director di DCA na e ocasion aki a gradici sra. Faritah Luidens pa tur loke el a haci riba tereno cultural y sigur mirando cu lo ta cumpli 50 aña den farandula. El a desea Faritah hopi exito cu su show.

Comments

comments